Fa trenta un jorns que lo professor de licèu Jaume Sastre comencèt una cauma de la fam per protestar contra lo mesprètz del govèrn balear envèrs las demandas e los planhs de la comunautat educativa. Mai d’un mes en cauma de la fam per forçar lo president de las Illas Balearas, José Ramón Bauzá, a acceptar lo dialòg amb los ensenhaires que defendon l’escòla publica en catalan e de qualitat. Sastre a pas encara recebut cap de comunicacion del govèrn, mas a recebut per contra fòrça mòstras de solidaritat arribadas de pertot, quitament d’Occitània. Bensai es mercés a aquel sosten que Sastre pren de vam.
 
Lo musician e èx-professor Biel Majoral li fa lo pòrtavotz tre que Sastre es tròp flac per recebre los mèdias e las vesitas. “Recep fòrça sostens, i a de moments fòrça emotius e supausi qu’aquelas emocions l’ajudan a subreviure”, çò ditz.
 
Sastre a decidit de contunhar sa cauma de la fam, qu’intra ja dins una fasa plan mai delicada. Los resultats de las darrièras analisis son normals, se se pren en compte que manja pas res. A perdut quinze quilos e es arribat a aquel ponch qu’al delà de cremar lo grais, son còrs comença ja a cremar de proteïna musculara. Diluns li faràn una autra analisi completa e un examen muscular. Los resultats diràn se la situacion implica un risc grèu per la santat d’aquel ensenhaire de lenga catalana dins sos cinquanta ans.
 
La volontat es de s’arrestar pas. Sastre e lo mond que lo sostenon son convencuts que son accion obligarà lo president balear a dialogar. “Quora o dirà, considerarem la possibilitat d’arturar la cauma”, çò ditz Majoral, qu’explica tanben que los sectors mai radicals del Partit Popular an començat de far cirular de rumors que se dona de manjar a Sastre. “An començat la guèrra psicologica”, benlèu es qu’an paur d’un gèst del president.
 
 
De sostens de pertot e de totas las colors politicas
 
Los sostens a Sastre arriban de pertot e de gents de totas las colors politicas, dont tres èx-presidents del govèrn. Lo deputat d’ÈRC Alfred Bosch expausèt l’afar dins lo parlament espanhòl. Lo sosten s’estend tanben sul ret, siá a travèrs de la campanha d’autofòtos promoguda per Help Catalonia, siá amb de messatges sus la pagina de Facebook, sul sieu blòg o sus Twitter. Al delà, an mes un libre de vesitas dins son ostal en Malhòrca per daissar testimoniatge del sosten e de la solidaritat. Qual o vòlga far personalament tanben pòt anar fins a l’Ostal Long de Palma, al costat de Son n’Espasas, ont i a un libre de vesitas per daissar testimoniatge del sosten e de la solidaritat. Iniciativa per Occitània a mostrat a Sastre son sosten e sa solidaritat.
 
La cauma de la fam es “una reaccion contra las agressions, lo maltractament e las vexacions”, çò dison los responsables de la campanha de sosten a Sastre. E apondon: “L’educacion es estada sequestrada per un govèrn qu’agís de faiçon unilaterala e temerària. Après dos ans, la cauma de la fam es una responsa al desprestigi, als dorsièrs punitius, a las imposicions, als atacs contra la lenga, a las retalhadas e al foment de l’escarniment contra l’escòla publica en catalan”.