La Banca Centrala Europèa (BCE) decidiguèt dijòus passat de rebaissar las taxas d’interès a un nòu minim istoric de 0,15%. L’organisme presidit per Mario Draghi a complit las expectativas e a retalhat de dètz decimalas las taxas per ensajar de reconduire l’inflacion e motivar la creissença economica. Las taxas èran al minim istoric de 0,25% dempuèi novembre d’arunan. Al delà de la rebaissa de las taxas convencionalas, la BCE a plaçat a –0,1% las taxas pels depauses de las bancas a Francfòrt, en las botant aital en negatiu, en una decision istorica que las forçarà a far circular mai d’argent dins l’economia reala.
 
La decision del conselh de govèrn de la Banca Centrala Europèa d’abaissar las taxas d’interès a un nòu minim istoric de 0,15% s’explica, principalament, perque l’inflacion los chepica. A 0,7%, l’inflacion se plaça a de nivèls plan en dejós de l’objectiu fixat per l’organisme, qu’es de 2%.
 
Un dels grands estonaments es estat la decision de la BCE de plaçar las taxas d’interès dels depauses a Francfòrt en negatiu. Pel primièr còp, en luòc de far pagar d’interèsses, las bancas auràn de pagar se vòlon daissar lors depauses dins la BCE.