Lo document qu’aprovèt ièr Convergéncia Democratica Aranesa (CDA), pendent sa Convencion Nacionala, reclama qu’Aran siá una entitat territoriala autonòma amb capacitat legislativa e executiva, e tanben una capacitat economica e financièra mai granda. Àlex Moga, secretari general de CDA, diguèt que lo partit “a coma objectiu dar un còp de man ath catalanisme politic en un moment cruciau”. Moga apondèt qu’aital Aran vòl tornar a Catalonha l’ajuda qu’a agut pendent los darrièrs 35 ans e qu’a permés qu’Aran recupère son identitat, son istòria, sas institucions e sa capacitat politica. De son costat, Jordi Rull, secretari d’organizacion de Convergéncia Democratica de Catalonha (CDC), diguèt que “dins una Catalonha que vòl exercir son drech de decidir, Aran i trobarà sa plaça e sa reconeissença”. Apondèt que se Catalonha a mai de capacitat de se governar, “aquò es positiu per Aran”.
 
Lo partit aranés manifestèt son sosten al partit catalan per rapòrt al drech de decidir de Catalonha, pel referendum per l’independéncia e per i votar de “òc” e de “òc” a la dobla question prevista.
 
“Er aranesisme deu apostar de manèra decidida peth catalanisme coma identitat nacionau qu’a comprenut melhor ath pòble aranés en li retornant drets pròpris”, çò diguèt Moga. E de fach aquela reconeissença se completarà dimècres que ven amb l’inici dels debats per la Lei d’Aran al Parlament de Catalonha.
 
Dins l’encastre d’aquela convencion, CDA a renovelat per quatre ans de mai l’acòrdi de collaboracion amb CDC, e a cridat a “renauir er aranesisme, a hèr-lo mès modèrne entà exportar ath Mond era identitat d’aguest territòri”, çò diguèt Moga, en reclamant d’estructuras intèrnas independentas e mai d’autogovèrn per o far possible.
 
L’eveniment comptèt amb la participacion de l’èx-president de Catalonha, Jordi Pujol.