La cort municipala de Moscòu condemnèt ièr dos òmes a perpetuitat per l’assassinat de la jornalista Anna Politkovskaia, qu’èra critica amb lo govèrn de Putin e que la fusilhèron dins l’intrada de son ostal en 2006 a Moscòu. Los condemnats son dos dels cinc individús declarats colpables lo mes passat: Rustam Makhmudov, que lo jutge considèra colpable d’aver tirat contra la victima, e son oncle, Lom-Ali Gaitukaiev, considerat lo responsable d’aver preparat la logistica. Los autres tres condemnats son estats sentenciats tanben de a penas de preson, mas per de periòdes inferiors.
 
Los dos fraires de Makhmudov, Ibragim e Dzhabraïl, son estats condemnats per dotze e per catòrze ans, respectivament, per aver ajudat a seguir Politkovskaia lo jorn que l’assassinèron. Lo cinquen òme, l’èx-policièr Sergei Khadzhikurbanov, l’an condemnat a vint ans per aver participat a la preparacion de l’assassinat.
 
Gaireben uèch ans après l’assassinat se sap pas encara qual l’ordenèt.
 
Politkovskaia, que moriguèt dins sos 48 ans, èra una jornalista engatjada e critica. Venguèt plan coneguda per sas informacions sus la guèrra de Chechenia. Recebèt de prèmis internacionals e participèt a la negociacion amb los sequestrators del Treatre Dubrovka de Moscòu. En 2004, mentre qu’anava negociar amb los sequestrators d’una escòla a Beslan, en Ossetia del Nòrd, venguèt subitament malauta e senhalèt qu’empoisonèron lo tè qu’aviá pres dins l’avion.