Doas personas sus tres son en situacion precària per se noirir, segon una enquèsta de Mètges del Mond publicada dijòus passat, en escasença del Jorn Mondial de Lucha contra la Fam, çò a raportat l’AFP.
 
En escasença del Jorn Mondial de Lucha contra la Fam, dijòus passat, Mètges del Mond publiquèt los resultats d’una enquèsta menada dins l’estat francés que revèla de dificultats d’accès a l’alimentacion dels mai precaris e l’impacte sus lor santat. L’enquèsta, realizada entre abril e mai de 2014, amb 346 pacients dels centres de suènhs que l’ONG a dins las vilas de Bordèu, Marselha e Niça e tanben de Lion, París, Saint-Denis e Estrasborg, descriu lor alimentacion tant en quantitat coma en qualitat, lors fonts d’aprovesiment e lor estat de santat.
 
Lo 97% dels enquestats son de migrants provenents d’en defòra de l’estat francés, de mond que patisson de fam e qu’a pena benefícian d’una ajuda alimentària per manca d’informacion. Una persona sus doas declara que manja pas a sa fam “sovent” o “de còps”, e lo 78% dels sondats son en situacion d’inseguretat alimentària per de rasons financièras.
 
Pels mai precaris, las jornadas sens manjar son abitualas per mai de 50% dels adultes e 20% dels enfants, qu’an passat almens una jornada sencera. Segon lo rapòrt, aquelas caréncias an un efièch dirècte sus lor santat. Lo jorn de l’enquèsta lo 34,5% dels pacients presentavan una patologia cronica o aguda restacada amb la manca d’alimentacion.
 
Mètges del Mond recomanda de “desvolopar d’ajudas alimentàrias adaptadas e determinadas” e de facilitar l’accès a l’aiga e a l’igièna, mas tanben de “metre fin als arrestats antiglenatge e antimendicitat, que constituisson de ressorsas de darrièr recors pels mai precaris”. L’enjòc es tanben d’informar “melhor” las personas en situacion de granda precarietat sus lors dreches e sus los dispositius existents d’ajuda alimentària”. Solament lo 41,9% dels fogals interrogats an beneficiat d’ajudas alimentàrias. Lo 61% de las personas enquestadas coneissián pas aqueles dispositius d’ajuda.