Atlas, una entitat sòcioculturala d’Igualada (Catalonha), a mes en evidéncia la xenofobia d’un partit politic ultradrechista nomenat Plataforma per Catalonha (PxC). Aquel partit xenofòb organizèt fa qualques jorns una jornada de collectatge de noiridura “exclusivament per de mond del país”. Mas Atlas —que trabalha per l’integracion de la diversitat sòcioculturala— faguèt una crida per que totes los ciutadans d’origina immigranta anèsson far de dons, e per que desmontèsson aital lo discors del partit racista.
 
Dins un vidèo, publicat sul ret, se vei coma un fum d’immigrants van a l’estand del partit xenofòb e i donan de paquets de noiridura. Totes los dons portavan un pegasolet que disiá “canvia el xip” (“càmbia lo chip”, valent a dire, “càmbia de vejaire”).
 
Los militants racistas qu’èran dins l’estand èran fòrt estonats. Un d’eles ensagèt de rebatre lo gèst en lor ofrissent de cambajon, per ensajar d’insultar los que se considerèsson de religoses musulmans.
 
Aquela accion d’Atlas fa partida de la campanha “Ieu soi tanben d’Igualada”, per combratre lo racisme e favorizar l’integracion.