Un pauc mei tard divés a Wrocław, Russia, miada per lo seleccionaire neerlandés Dick Advocaat, s'ei impausada aisdtament 4 a 1 contra Republica Chèca mercés notadament a dus gols de l'atacant deu CSKA Moscòu Alan Dzagoev. Russia confirma donc son estatut d'outsider en aquera competicion.

 

Aqueste dissabte se jogavan los dus encontres deu "grop de la mòrt".
 

A Kharkiv en Ucraïna, País Baish èran opausats a Danemarc, qu'a ganhat la competicion a la susprèsa generala en 1992. En aquesta partida tanpòc èran pas favorits mes se son impausat 1 a 0. Ei Michael Krohn-Dehli, lo jogaire de Brøndby qu'a marcat lo sol gol de la partida après 25 minutas de jòc. Los Iranges an dominat en seguir l'encontre e Robben a tocat lo pòst dab una bona frapa de l'exterior de la susfàcia. Mes Danemarc, mercés a una organizacion defensiva rigorosa a tiengut, dab mei d'aplicacion auré quitament podut mercar un segon gol. En las 20 darrèras minutas País Baish se son un pauc desmobilizats maugrat una man danesa non shiulada qui podèva balhar un penalti aus bataves. Danemarc enregistra donc dab susprèsa sa prumèra victòria en aqueste Euro 2012 contra una equipa qu'avè pas batut despuish 45 ans !

 

L'autre encontre deu grop B opausava Alemanha e Portugal. S'esperava una polida partida e los amorós de fotbòl estón pas decebuts. Granda animacion ofensiva deus dus costats autanlèu lo debut d'aquela partida. Los alemans an dominat lor adversari mei ei plan Portugal qui èra pròche d'ubrir la merca dab un tir de Pepe suu pòst.
 

En segond periòde, los portugués semblavan un pauc cançats e Alemanha n'a profieitat per mercar : Mario Gómez a concretisat un centre de Khedira dab un de cap remirable. Cristiano Ronaldo, lo capitani superstar de Portugal, ei demorat plan discret maugrat un bon tir a dètz minutas de la fin de la partida. Dab un centre tir, lo portugués Nani a trobat la barra transversala de Manuel Neuer. Maugrat duas darrèras accions dangerosa de Varela e Nani, Portugal se pèrd aquera prumèra partida de l'Euro. Alemanha confirma son estat de favorit de la competicion.




Matieu Casanòva