Del 7 al 13 de julhet se debanarà a La Guépia (Segalar) l’edicion 2014 de l’Universitat Occitana d’Estiu, al còp dins la rega de las annadas passadas e amb un vam novèl.

Encara los corses del matin, amb Rogièr Carrié, Sèrgi Gairal, Renat Juriè, Murièl Vernhèras, Florenç Vialada, e las activitats coma de costuma. Mas ongan l’ofèrta culturala s’alarga amb de talhièrs de musicas e danças occitanas novèlas, de rencontres amb de personalitats de la literatura, de rencontres improvisats de musicians e de poètas dusca a las auretas, un bal per totes, una granda jornada de la paraula occitana d’un còp èra e d’ara. E tot plen de suspresas.
 
 
Lenga
 
L’Universitat Occitana d’Estiu de La Guépia prepausa cada matin de corses e de talhièrs de lenga de quatre nivèls, segon las competéncias de cadun, totjorn dins un ambient d’escambis.
 
Aquò es tanben valedor pels talhièrs de traduccion ont Claudi Sicre e Sèrgi Carles animaràn una reflexion amb lo supòrt d’un discors de Joan Jaurés e d’una cançon. Animaràn tanben un talhièr de traduccion a l’entorn dels sostitolatges del filme Sounder, projectat lo dimars 8 de julhet. Es de mancar pas tanpauc lo talhièr de Roland Pécout sus l’oralitat e l’escritura literària e jornalistica.
 
 
Conferéncias
 
Una plaça serà reservada a las commemoracions dins aqueste an del centenari de la mòrt a l’encòp de Joan Jaurés e de Frederic Mistral. Se tracta de se remembrar tant coma de temptar de ne sortir un eiretatge actualitzat amb una conferéncia “Frederic Mistral seriá (encara un còp) d’actualitat?”, per Roland Pécout e Michel Buisson de l’associacion CRÈDDO. Lo dijòus 10 de julhet a 18 oras una taula redonda acamparà Rémi Pech, Jean-Jacques Rouch e l’Associacion Joan Jaurés Espaci Tarn abans la projeccion del filme de Daniel Vigne, Qu’allez-vous faire de vos vingt ans?
 
Doas autras conferéncias faràn lo ligam amb lo territòri, amb Josiana Bru que presentarà un expausat sus “La literatura orala, las collèctas del sègle XIX e Antonin Perbosc” e Christian Pierre Bedel sus “L’escòla e l’occitan en Avairon”. Una darrièra se vòl mai dirigida als neoaprenents del mond anglofòn amb una “Descubèrta de la lenga e de la civilizacion occitana” per Patrick Hutchinson, en anglés !
 
 
Programacion culturala
 
L’encastre agradiu d’aquel vilatge al confluent d’Avairon e de Viaur, sertit de camps e de bòsques, susplombat per un espantant castèl cargat d’istòria qu’apertenguèt al comte Ramon VII de Tolosa (que se poirà vesitar en lenga nòstra), serà propici a l’expression de la lenga e de la cultura occitana amb una programacion rica. De talhièrs de dança tradicionala (Corinne Giacomello) o  “new trad “ (Flore Sicre), un talhièr de cant (Manu Théron) e un de dub (Louis Pezet) e d’autres mai salvatges…
 
Aprenents e professionals se mesclaràn pendent los aperitius-concèrts (Christian Bouygues, Papet J, Doctors de Trobar, Manu Théron, Bassacada…). Dos eveniments particulars auràn per protagonistas lo grop Nòu Sòrres en concèrt lo dimècres 9 de julhet e las Bombes 2 Bal amb sos convidats, lo divendres 11 de julhet, amb entre d’autres Arnaud Cance e lo trio Cocanha…
 
 
 
 
Renaud Savy
 
 
_____
Tot lo programa sus www.lengaviva.com.
Tarifa per la setmana: 100 èuros, demandaires d’emplec, estudiants: 60 èuros
Inscripcion al +33(0)6 42 50 34 84 o a lengaviva2(a)gmail.com.