De desenats de milièrs de personas —100 000, segon los organizaires— manifestèron dissabte al centre de Barcelona per defendre l’escòla catalana e mostrar lor refús contra la lei de la reforma educativa (LOMCE segon sa sigla en espanhòl) impausada pel ministre José Ignacio Wert, que son aplicacion es a entrar en vigor. Lo lèma èra “Per un país de totes, decidissèm l’escòla catalana”. La convocacion veniá de Som Escola, una plataforma qu’amassa d’associacions de professors, escolans e parents. I manifestèron de familhas entièras, e tanben de representants del govèrn de Catalonha e de totes los partits politics, amb l’excepcion del Partit Popular (PP) e Ciutadans (C’s). Los pòrtavoses de cada partit refusèron la LOMCE e defendèron lo modèl actual d’escòla catalana, ont l’educacion garentís lo mestritge de totas las lengas oficialas, e se fa en immersion en catalan, e en occitan en Aran.
 
A la fin del percors, la presidenta d’Òmnium Cultural legiguèt lo manifèst unitari, qu’avertís que la LOMCE es “una menaça reala” que “secuta” l’escòla catalana.
 
La LOMCE, qu’intrarà lèu-lèu en vigor, establís que l’espanhòl es la sola lenga veïculara dins tot l’estat, crèa d’examens d’avaloracion centralizats a Madrid en fin de primària e segondària e redutz lo poder de las associacions de parents d’escolans. Las matèrias restacadas a las lengas dichas cooficialas (occitan, catalan, galèc e basco) se considèran de matèrias d’especializacion opcionalas. Lo PP argumenta que sa lei vòl “esclarzir que lo castelhan pòt pas èsser expulsat ni mesestimat dins lo sistèma educatiu”. Mas amb aquela lei perdrem l’immersion en aranés dins las escòlas d’Aran.
 
De mai, i aguèt un remembre per Jaume Sastre, lo professor qu’es en cauma de la fam dempuèi 38 jorns a Malhòrca contra las politicas educativas del govèrn del PP; e tanben pel País Valencian, ont de milièrs de familhas pòdon pas escolarizar lors enfants en catalan. En resumit, se defendèt que Catalonha, lo País Valencian, las Illas Balearas, Catalonha Nòrd, la Franja e l’Alguer son una “unitat lingüistica” e “una comunautat de dètz milions d’europèus repartits dins quatre estats” que son jonches en la defensa de la lenga.
 
D’un autre costat, la presidenta d’Òmnium Cultural, Muriel Casals, defendèt la desobesissença a la LOMCE e exigiguèt que lo govèrn de Catalonha dictèsse “d’instruccions plan claras e precisas que donèsson fisança als centres educatius, que se tenguèsson fermes dins lors valors educativas e daissèsson pas brica recular la preséncia del catalan dins las salas d’estudi”.
 
La manifestacion s’acabèt amb d’animacions infantilas e de concèrts. Pendent la marcha s’entendèt de crits en favor de l’independéncia de Catalonha, e se debanèt dins un ambient festiu e convivial.



Clam en defensa de l'escola catalanaper vilawebtv
 
 


Tuits sobre "#somescola14j"