Los pòbles autoctòns aprofièchan l’eveniment esportiu per reclamar al govèrn que delimite lors tèrras. S’es anonciat de nòvas mobilizacions “tant que las societats indigènas sofriràn”. Lo budget per la seguretat pendent la Copa del Mond es tres còps mai naut que lo que Brasil destinèt en 2013 a l’agéncia governamentala pels dreches dels pòbles indigènas. Après la Copa del Mond, un estadi poiriá venir una preson.

Segon un sondatge presentat aqueste mes pel Pew Research Institute, lo 61% dels brasilièrs pensan que l’organizacion de la Copa del Mond de fotbòl en Brasil es una question negativa, dins lo sens que las enòrmas quantitats d’argent qu’an despensadas per far possible l’eveniment las an sostrachas dels budgets destinats als servicis publics de primièra necessitat. Lo 39% creson que l’eveniment farà mal a l’imatge de Brasil, mentre que solament lo 35% creson que li farà de ben. A pena lo 34% creson que serà avantatjós pels emplecs que crèa o crearà.
 
Lo sondatge s’es realizat dins l’encastre de las grandas manifestacions de protèsta, qu’emplegan la plataforma mediatica de dimension internacionala que lor ofrís la Copa del Mond. Totas las manifestacions ensajan far veire las realitats escuras d’un país emergent. E demest las protèstas principalas i a los pòbles indigènas. Ne rapòrta, entre d’autres, l’associacion Survival International, qu’a amodat una campanha entitolada “Lo costat escur de Brasil”. La campanha soslinha d’aspèctes coma lo fach que los estadis sián bastits en tèrra indigèna, e que siá justament la despossession de las tèrras dels autoctòns un dels factors amb los quals Brasil bastís sa creissença.
 
 
De Brasília a Rio de Janeiro
 
Los indigènas son pas totes sols, van amassa amb de grops de personas que vivon dins la misèria o amb los que la critican amb duretat. Aquela situacion s’es ja constatada, particularament, dins las manifestacions de Brasília, de Rio de Janeiro e de Manaus, de vilas qu’acuèlhon las partidas de la Copa del Mond.
 
Las manifestacions dels indigènas per las carrièras de Brasília, la capitala del país, pendent la darrièra setmana del mes de mai, portavan de bandieròlas que s’i podiá legir “Non a la FIFA, òc a la demarcacion”. Aquela revendicacion s’adreiçava al govèrn brasilièr per que protegiguèsse las tèrras dels pòbles indigènas, vitalas per lor subrevivença.
 
Los indigènas se veson impotents perque i a pas pro de ressorsas per la demarcacion de lors tèrras del temps que n’i a per bastir o per renovelar d’estadis. Amb l’agravament que, dins lo cas de Manaus, i a fòrça dobtes que l’estadi s’emplegue après l’eveniment mondial per jogar al fotbòl: la vila a pas cap d’esquipa en primièra division. Lo govèrn de l’estat d’Amazonas es quitament a perpensar la possibilitat de l’emplegar coma preson.
 
Encara una autra donada: lo govèrn brasilièr a destinat, solament pels servicis de seguretat de la Copa del Mond, la chifra de 800 milions de dolars. Lo còst total de l’organizacion de la competicion monta al dessús dels 11 miliards de dolars. Per o comparar: lo budget de l’agéncia governamentala per la proteccion dels indigènas del Brasil (FUNAI) foguèt, en 2013, de 275 milions de dolars, e Forbes calcula que lo budget de la Copa del Mond equival al 61% de tot lo budget annual per l’educacion en Brasil.
 
 
Qu’es en jòc?
 
Dins cada manifestacion los representants dels pòbles indigènas repetisson constantament çò qu’a dich Sonia Guajajara, coordenaira nacionala de l’Associacion dels Pòbles Indigènas, a la ministra de la justícia: los indigènas sortisson per carrièras per demostrar aquò: “sens la nòstra tèrra [sèm] encadenats, presonièrs”.
 
E aqueles pòbles figuran pas dins la documentacion que lo govèrn brasilièr a liurat a la FIFA per informar sus Brasil, segon çò que denóncia Survival. Coma s’existissián pas, e mai se son los descendents dels primièrs abitants del país. S’agís d’aperaquí un milion de personas, devesidas en 240 tribus, qu’encara son aicí malgrat las persecucions e los genocidis dels darrièrs sègles.
 
Lo cap del pòble kayapó, Raoni Metuktire, una figura legendària de la resisténcia dels pòbles indigènas de Brasil, a començat una tornada per qualques vilas d’Euròpa per explicar cossí vivon, los pòbles indigènas de Brasil, l’eveniment de la Copa del Mond de Fotbòl: “Espèri qu’en aqueste periòde de la Copa del Mond, los pòbles fagan atencion als indigènas e a Amazonia, que nos comprengan e que nos ajuden”, çò a dich.
 
Parallèlament, se repetirà de manifestacions d’indigènas a São Paulo e Porto Alegre, doas de las vilas qu’acuèlhon de partidas. Lo messatge: los pòbles indigènas vòlon pas èsser expulsats de lors tèrras en seguissent los òrdres dels responsables de las companhiás minièras, dels latifondistas e de las entrepresas de construccion. Son de manifestacions criticas contra lo govèrn brasilièr, qu’a suspendut las negociacions amb los pòbles indigènas sus la demarcacion e, eventualament, sus l’atribucion de lors tèrras. Una suspension inacceptabla, segon los indigènas, e mai se lo Ministèri de la Justícia lor a comunicat que la mesura es destinada a evitar que s’agraven los conflictes violents. Roberto dos Santos, cap del pòble kaingang, afirma: “Daissarem pas la Copa se jogar tranquillament tant que las societats indigènas sofriràn [...]. L’idèa es de paralisar la region del sud, en recorrent al blocatge de totes los caireforcs de comunicacion terrèstres.”
 
 
 
 
 
 
 
Aquesta nòva es adaptada de Nationalia amb qui Jornalet a un acòrdi de cooperacion.