“Catalonha a l’obligacion de donar de valor a la coneissença de l’occitan”, çò diguèt lo conselhièr de la cultura de la Generalitat de Catalonha, Ferran Mascarell, en tot inaugurar diluns passat l’onzena edicion del Congrès de l’Associacion Internacionala d’Estudis Occitans (AIEO). Mascarell diguèt que cal “donar de valor a la coneissença de l’occitan, refortir la lenga catalana, e enfortir la diversitat de las lengas que demòran en Catalonha, e dins aquel cas l’occitana, pr’amor qu’aquela pluralitat es positiva per la cultura del nòstre país”. “Se sabèm amb mai d’aprigondiment l’istòria e la realitat de la lenga occitana, poirem agir de manièra mai clara e prigonda”, çò apondèt, en soslinhant “l’existéncia d’una cadièra d’occitan a l’Universitat de Lhèida”.
 
Dins l’inauguracion, lo conselhièr diguèt tanben qu’“aqueste congrès serà enòrmament important pel desvolopament de la lenga catalana e l’occitana, pr’amor que contribuirà a evitar de plantejaments d’exclusion e que favorirà la concepcion de la pluralitat lingüistica que desiram per Catalonha”.
 
A l’inauguracion participèt tanben lo rector de l’Universitat de Lhèida, Roberto Fernández Díaz, e lo president de l’AIEO, Walter Meliga. I èran maitot presents la directrtiz generala de la politica lingüistica de la Generalitat de Catalonha, Ester Franquesa, e lo coordenaire del congrès e titular de la cadièra d’occitan a l’Universitat de Lhèida, Aitor Carrera.
 
Es aquela Cadièra d’Estudis Occitans qu’organiza l’onzena edicion del Congrès, amb lo sosten del govèrn catalan. Es lo primièr còp que lo congrès de l’AIEO se celèbra dins un territòri que l’occitan i es lenga oficiala.
 
Los divèrses rapòrts presentats dins lo congrès tractan de l’occitan modèrne, l’occitan ancian, la literatura occitana medievala, la literatura occitana modèrna e contemporanèa, las politicas lingüisticas d’Occitània e mai la cultura occitana, entre d’autres subjèctes.