An mes en libertat un dels dos suspèctes d’aver tuat Clément Meric a París en junh de 2013, qu’èra en preson provisòria, segon çò que rapòrta l’AFP. S’agís de Samuel Dufour, de 20 ans, que la cort d’apelacion de París n’a ordenat la mesa en libertat, e qu’es mes en examen per de “violéncias volontàrias en reünion e amb arma en aver entraïnat la mòrt sens intencion de la donar”. Son camarada, Esteban Morillo, es mes en examen per la meteissa causa mas demòra en detencion provisòria.
 
Morillo reconeguèt tre lo primièr moment d’aver portat dos còps de ponh, a mans nudas, a la cara del jove antifaissista assassinat. De son costat, Dufour a totjorn negat d’aver frapat Clément Meric, çò que confirma un amic de la victima dins la declaracion que faguèt al jutge. Los dos detenguts son de simpatizants del grop d’extrèma drecha Troisième Voie (Tresena Via).
 
Al delà de Morillo e de Dufour, dos autres militants ultradrechistas son meses examen per aquel assassinat mas son pas estats detenguts. De grops antifaissistas son partidas civilas.
 
Clément Meric foguèt assassinat lo 5 de junh de 2013, un dimècres de ser. Lo jove breton, militant antifaissista, foguèt brutalament agarrit al centre de la capitala francesa per tres ultradrechistas. La victima, dins sos 18 ans, estudiava las sciéncias politicas a París e èra activista d’un sindicat d’estudiants.