Actualitats
Russia trabalhariá secretament emb los ecologistas opausats au gas de sistre
Lo secretari generau de l’OTAN a declarat que Russia organiza de las campanhas de desinformacion sus la fracturacion idraulica per garentir los aprovesiments europèus en gas rus.
Los opausants occitans au gas de sistre seràn segurament fòrça susprés d’o aprene mas, segon Anders Fogh Rasmussen, ancian primier ministre danés e secretari generau de l’OTAN, Russia los ajudariá secretament. “Rescontrèi d’aliats que pòdon raportar que Russia, dins l’encastre de sas operacions sofisticadas d’informacion e de desinformacion, es activament engatjada emb las organizacions dichas non-governamentalas —organizacions ecologistas que trabalhan contra lo gas de sistre— per manténer la dependéncia europèa au gas rus importat”, çò declaret, segon çò que rapòrta The Guardian. Rasmussen precisèt pas quala forma pren quel engatjament nimai se los ecologistas sabián que trabalhavan emb daus agents de Moscòu. “Qu’es mon interpretacion”, çò diguèt.
Las associacions ecologistas an lèu-lèu atacat quelas declaracions, especialament sus los malhums sociaus. “L’idèa que siam de las marionetas de Putin es tant absurda qu’avèm de nos demandar çò que fuman au sèti de l’OTAN”, çò diguèt Greenpeace, que veguèt 30 de sos militants achabar dins las presons russas après una accion dins l’Artic. Lo servici de premsa de l’organizacion transatlantica precisèt que las remarcas èran daus ponchs de visda personaus de Rasmussen e pas de las posicions oficialas.
Rasmussen apondèt que la seguretat energetica èra de la mai bèla importància e qu’es necessari per las nacions europèas de diversificar lors fonts d’aprovesiment. Se, per se, la fracturacion idraulica poiriá garentir l’avenidor energetic d’Euròpa, quò es pas la chausida de tots los estats. França interdiguèt quela tecnica a la visda daus problèmas ecologics que coneis l’America dau Nòrd. Per lo govèrn polonés, favorable a la fracturacion idraulica, l’obstacle primier demòra la geologia. Polonha, emb sas resèrvas bèlas en gas de sistre, serà benlèu dins l’incapacitat d’i accedir.
Maime Caillon
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Efectivament, setz pas oblijat de creire a quela cagada. Mas la diferéncia mager emb lo complotisme a l'entorn dau 11 de setembre (las tors bessonas de segur) qu'es qu'aqui avem un oficiau daus importants que fai quela anoncia publicament. Se'n parla pas en França mas la premsa anglosaxona (britanica tant coma americana) iò fai e avetz daus artciles pròfracking qu'explican lo dangier de pas desvelopar los gas d'eschiste per la dependéncia qu'avem au gas rus - coma 'na novela guerra freja sus lo front energetic.
E nos caldrià creire aquesta cagada? Es tan verai coma que son los estatsunians qu'an organisat lo 11 de setembre. Evidentament, parli de la torres bessonas pas de Santiago de Chile.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari