La Balma Chauvet (Bas Vivarés) intrèt ièr dimenge al patrimòni mondial de l’UNÈSCO. “Los vestigis arqueologics, paleontologics e artistics de la balma illustran coma dins cap d’autra balma del començament del Paleolitic superior la frequentacion de las balmas per de practicas culturalas e ritualas”, çò diguèt lo comitat de l’UNÈSCO (l’agéncia de l’ÒNU per l’educacion, la sciéncia e la cultura).
 
La Balma Chauvet conten de pinturas muralas de mai de 30 000 ans. Foguèt descobèrta lo 18 de decembre de 1994 per tres espeleològs, Éliette Brunel, Christian Hilaire e Jean-Marie Chauvet, e es aqueste darrièr que li balhèt son nom. Plaçada dins la comuna de Valon (Bas Vivarés), s’estend sus 8000 mètres cairats e aculhís un fum de pinturas rupèstras datadas de 25 000 a 33 000 ans. A l’ora d’ara es barrada al public per garentir la conservacion de las pinturas, e a partir de l’an que ven se’n poirà vesitar un facsimile que reconstituís 3500 mètres cairats de balma.