Jean-Claude Giorvano, un pastor de Molinet (Val de Ròia), que perdèt 58 motons, fedas e anhèls en seguida d’un atac de lops, a denonciat l’enebicion d’abatre los predators en pausant totas sas bèstias mòrtas sus l’abèrg d’aculhença del pargue nacional de Mercantorn. Giorvano, que trobèt sas bèstias mòrtas dins lo riu de Beura divendres passat de matin, anèt amb un amic pausar los cadavres davant lo ponch d’aculhença del pargue nacional situat a l’intrada del massís de Proverieras, e ne pengèt qualques unas als panèls d’informacion.
 
Giorvano estima que los responsables del pargue nacional son tanben los responsables de la multiplicacion del nombre de lops en tot empedir que se pòsca organizar de batudas, çò que lo director del pargue parteja pas, segon Nice Matin.