La polícia italiana a arrestat un òme de 68 ans coma presumit autor de l'atemptat del 19 de mai en un licèu de la vila italiana de Brindisi. Segon qualques mèdias italians, l'òme a confessat èsser l'autor de las explosions que tuèron una gojata de 16 ans e ne feriguèron dètz mai. Al començament de l'enquesta, la polícia aviá ligat l'atemptat amb la màfia italiana.

Après èsser enquestat pendent qualques oras, lo presumit autor de l'atemptat confessèt aver plaçat e activat los espleches explosius davant lo licèu, totjorn segon de mèdias italians.
 
Giovanni Vantaggiato es proprietari d'un depaus de combustibles dins la vila de Copertino (província de Lecce) e dins la declaracion a la polícia auriá soslinhat que l'objectiu èra pas lo licèu mas lo Palais de Justícia, plaçat a 200 mètres aperaquí del centre educatiu; l'òme se voldriá venjar per aver pas recuperat l’argent perdut en un procès per fraudariá.
 
La siá veitura, una Fiat Punto, sortís dins fòrça enregistraments al ras del licèu Morvillo Falcone, dissabte 19 de mai: es lo jorn, presumidament, ont faguèt esclatar tres botelhas de gas que tuèron la liceana Melissa Bassi.