La Deputacion de Lhèida presentèt dimars passat las quatre rotas que fan partida de l’iniciativa nomenada “Perseguits e salvats”, que recupèra los itineraris emplegats per  mai de vint mila personas perseguidas pendent la Segonda Guèrra Mondiala per fin de fugir l’olocaust nazi a travèrs dels Pirenèus. L’ambaissador d’Israèl en Espanha, Alon Bar, assistiguèt a l’acte d’inauguracion dels quatre itineraris senhalizats, que passan per Catalonha e per la Val d’Aran.
 
La proposicion “Perseguits e salvats” se presentèt en octòbre de 2013 coma una iniciativa toristica, antropologica e de recuperacion de la memòria istorica. Mas tanben cèrca d’èsser un “omenatge a la solidaritat de mantas personas anonimas que contribuiguèron a salvar de vidas, de personas, de familhas e de culturas”.
 
En mai de la senhalizacion de las rotas, l’iniciativa compren tanben un sit web en sièis lengas: occitan, catalan, anglés, castelhan, francés e ebrieu.
 
Pendent lo conflicte, fòrça mond traversèron los Pirenèus en direccion del sud per fugir las persecucions del nazisme, en passant per quatre rotas que son ara senhalizadas amb la tòca de recuperar la memòria istorica de certans faches que son, en general, pas gaire coneguts.
 
Los que poguèron traversar los Pirenèus visquèron d’evasions epicas après fugir los nazis de la França ocupada. Lors istòrias son un testimoniatge de l’orror demorada dins l’Euròpa d’entre las doas guèrras e de las consequéncias que la barbariá produguèt a de milions de familhas. A l’encòp, meton en evidéncia lo ròtle dels Pirenèus coma luòc de refugi e salvacion, amb l’ajuda e la solidaritat dels abitants dels païses frontalièrs.
 
Las rotas senhalizadas se pòdon seguir a pè, en bicicleta o en veitura. Las rotas d’Aran son totas abilitadas per que se seguiscan amb un veïcul. Al delà de la senhalizacion, i a de plafons al Musèu de la Val d’Aran a Vielha.