Los escolans paures del Pontet (Comtat Venaicin) auràn pas pus lo servici de cantina gratuita, segon çò qu’anoncièt lo nòu cònsol del Front Nacional, Joris Hébrard. La justificacion son las economias que deu far la vila. “Cau responsabilizar lei parents d’escolans per li mostrar que tot es pas gratuit”, çò defendèt Hébrad.
 
Mas l’oposicion es indignada pel fach que los 30 000 èuros d’economias que se farián amb aquela mesura antisociala son pas res dins un budget de 50 milions, segon çò que rapòrta La Provence. Pasmens, lo cònsol insistís: “Lei pichons rius fan lei grands flumes”. De mai Hébrard considèra que la mesura es pas brica antisociala: “M’estonariá que de gents poguèsson pas pagar 1,57 èuro per jorn”.
 
 
Aumentacion del salari del cònsol
 
Ça que la, lo salari del cònsol a pojat considerablament. En abril, Hébrard faguèt votar en conselh municipal una aumentacion del 44% de son salari, es a dire, qu’ara ganha 1000 èuros de mai cada mes, çò que tanben soslinha Le Figaro.
 
Es “escandalós”, segon Claude Toutain, representant de l’oposicion, “se tòca lei familhas pus desfavorizadas, lei gents que son a l’RSA, lei familhas monoparentalas”. Dins aquel sens, Toutain remarcava que “l’aumentacion dau salari dau cònsol de 1000 èuros per mes permet[riá] de finançar 500 repais per mes”.