Long de tres oras, Google anoncièt dimècres passat, a un centenat de desvolopaires, dins una conferéncia a San Francisco, sas principalas novetats e sos plans en programari e maquinari. Lo gigant de las cèrcas i presentèt son estrategia Android L, que pretend estendre lo sistèma operatiu dels telefòns mobils als encastres de la television, dels veïculs e de las mòstras.
 
 
Android TV
 
Amb lo nom d’Android TV, Google anoncièt una version melhorada e engrandida del sieu Chromecast, lo petit aparelh que convertissiá lo televisor en un dispositiu multimèdia. Ara vòl far un pas endavant e integrar completament la plataforma Android a la tèle per i far veire de vidèos en streaming dempuèi Google Play, YouTube e d’aplicacions coma Netflix, en mai de jòcs.
 
 
Android Auto
 
Google vòl tanben portar lo sieu sistèma operatiu a las veituras. Amb Android Auto, cèrca de crear un poderós assistent de conducha, dessenhat per minimizar las distraccions. Mai de trenta fabricants de veïculs se son ja associats amb Google per i integrar aquel sistèma qu’englòba la navigacion de Google Maps, l’escota de musica personalizada o d’emissions a travèrs de Play Music e mai la cèrca per votz amb Google Now...
 
 
Android Wear
 
E amb Android Wear, dempuèi lo ponhet, l’usatgièr pòt accedir rapidament a tota mena d’informacions en prononciant solament “OK Google” e en demandant quicòm, o ben en ordenant al telefòn mobil que consulte l’agenda o l’estat del trafec, o que telefòne a un taxi...