Lo primièr torn de las eleccions legislativas francesas a balhat la victòria als socialistas e als lors aliats, qu’an amassat 40% dels vòtes. Malgrat aquela victòria, los sondatges que prevesián un enfonzament de l’UMP se son enganats: lo partit de Nicolas Sarkozy a resistit en tot capitar un vòte sus tres, çò que fa una egalizacion tecnica amb lo PS.

La rèsta dels partits es demorada plan luènh, malgrat que lo Front Nacional a obtengut un resultat fòrça bon amb 14% dels vòtes. Lo Front d’Esquèrra ven quatren amb 6,5% dels vòtes e Euròpa Ecologia-Los Verds (EELV) a amassat 5% dels sufragis. Lo MoDem es estat un dels perdents de la nuèch en obténer qu’1,7% dels vòtes.
 
Una de las nòvas de la nuèch es lo grand resultat obtengut per Marine Le Pen dins la circonscripcion d’Hénin-Beaumont. La candidata de l’FN a capitat un espectacular 42% dels vòtes, çò que li balha de condicions per venir deputada nacionala al segond torn. Per contra, lo cap del Front d’Esquèrra, lo jacobin Jean-Luc Mélenchon, a patit dins aquela meteissa circonscripcion una bofa electorala de las grandas, en demorar a la tresena posicion darrièr lo candidat socialista. Lo sieu sòmi gloriós de véncer Le Pen es vengut una patetica cachavièlha.
 
Un autre dels grands vencuts de la nuèch electorala es estat lo MoDem e mai concretament lo sieu principal dirigent, lo bearnés François Bayrou. El meteis es demorat en segonda posicion dins la siá vila natala de Pau amb 23% dels vòtes, çò que fa plan malaisit que pòsca ratificar lo sieu sèti a París, que l’a dempuèi 1988. Bayrou es estat vencut per la candidata socialista Nathalie Chabanne, qu’a obtengut gaireben 35% dels vòtes.
 
Per rapòrt als partits regionalistas e nacionalistas, los candidats occitanistas an fach de resultats discrets. Gustau Aliròl del Partit Occitan (POC) a amassat un notable 6,27% dels sufragis. Cal tanben destacar que l’independentista canac Jean-Pierre Djaiwé es demorat en primièra posicion a la segonda circonscripcion d’aquela illa. En Alsàcia, los autonomistas d’Unser Land an fach d’istòria en obténer un brave 9,7% dels vòtes. En Corsega, dos candidats de Femu a Corsica an passat al segond torn e, en Bascoat, la coalicion abertzale EH Bai a capitat la tresena posicion per lo primièr còp dins l’istòria.
 
Tre lo primièr torn s’es elegit 27 deputats, que solament un es estat elegit pel primièr còp. D’aqueles 27 deputats elegits lo 10 de junh, solament 7 son de femnas. Lo segond torn se debanarà lo 17 de junh e s’elegirà los 550 deputats restants.