D'un costat lo gran favorit d'aqueth Euro 2012, Espanha, qu'a ganhat la darrèra edicion e qu'ei campion deu monde en títol. De l'autra part, Itàlia, qu'a conegut una preparacion pro perturbada per navèths escandales de partidas crompadas en lo campionat de Serie A. Aquò a pas semblat geinar los italians qu'an obtiengut un bon nul 1 a 1 contra una equipa de "La Roja" tròp brolhona.

 

En prumèr periòde, italians e espanhòus an amuishat vertadèras feblèssas en la construccion deu jòc e las duas equipas son tornadas au vestiari sus un escòre nul. Ei Di Natale, entrat en jòc per remplaçar un Balotelli mauestruc e pas pro disciplinat, qu'a ubèrt la marca per Itàlia un pauc abans l'òra de jòc. L'atacant de l'Udinese pròva atau qu'ei pas acabada una carrièra de jogaire internacionau a quasi 35 ans.

 

Espanha a pas esperat cinc minutas per reagir: lo catalan Cesc Fàbregas, sus una passa remirabla de Silva, a egalizat per Espanha, qui l'esquèma tactic en aquera partida ei pro criticable: lo seleccionaire Del Bosque a causit de jogar shens atacant de punta pendent mei d'una òra. Entrat pendent la partida, Fernando Torres a pas tanpòc convençut.

 

Fin finala aqueth encontre nul, 1 pertot, ei pro logic. Maugrat lor dominacion en segond periòde, los espanhòus an pas sabut bolegar la defensa italiana miada per un Giorgio Chiellini impressionant. Itàlia confirma que demora una grana nacion de fotbòl e que calerà comptar dab era en aqueth Euro.

 

En l'autre encontre deu grop C èran opausats Irlanda e Croàcia, duas equipas qui son passadas per los barratges per se qualificar per l'Euro e qui se son pas vertaderament rasseguradas dab las partidas amicalas de preparacion.

 

Aqueth encontre s'anonciava dejà decisiu en aqueth grop pro relhevat e a d'aqueth jòc, los croates son estats los mei realistas. An ubèrt la marca sonque après quauquas minutas de jòc mercés a l'atacant de Wolsburg Mario Mandžukić. Seán St Ledger a egalizat per Irlanda mes juste abans la mieja temps, lo croate Jelavic a balhat l'avantatge a sa seleccion. Una dominacion croata confirmada en segond periòde per un tresau gol.

 

La qualificacion sembla ara quasi impossibla per l'Irlanda de Trapattoni. Per contra per Croàcia, prumèra deu grop, un bon resultat contra Itàlia o Espanha pòt obrir las pòrtas deus quarts de finala.




Matieu Casanòva