La polícia catalana es a enquestar sus una agression racista que se passèt dins lo mètro de Barcelona la dimenjada passada, que foguèt enregistrada amb un telefòn mobil e publicada sus YouTube. Sul vidèo se pòt veire un jove blond amb la cara pixelizada qu’agarrís un jove asiatic, en li administrar de còps de ponh, fins que lo mond que viatjavan dins lo meteis vagon sautèron sus l’agressor, e la victima tombèt sus lo cai de l’estacion seguenta.
 
L’afan exibicionista dels joves nazis los perdèt. Los quites agressors publiquèron lo vidèo sul ret, e, en seguida d’una alèrta començada pel jornal Llibertat.cat, qualques mèdias en linha e d’internautas capitèron a trobar los agressors e publiquèron lors identitats e adreiças, e los denoncièron a la polícia.
 
La victima es un jove de vint e cinc ans, nascut en Mongolia e resident a Barcelona. Dimenge de ser, el tanben denoncièt l’agression a la polícia de Catalonha, que diluns avián ja detengut l’agressor: s’agís d’un jove menor de nacionalitat russa, pro conegut per publicar sul ret de vidèos omofòbs e supremacistas. An tanben mes en causa dos autres joves: l’autor del vidèo e un autre de la còla que viatjava amb eles. Segon de fòtos publicadas per qualques internautas, eles serián sortits de familhas pro conegudas per militar contra l’educacion en catalan, e pròches del partit espanholista Ciutadans, e mai s’aquel partit o nega. Los detenguts serián tanben restacats amb un ret ja desarticulat d’agressions omofòbas.
 
La comuna de Barcelona a dich que farà una denóncia particulara contra aquela agression; e mai a mes totes los enregistraments del mètro a disposicion de la polícia.