L’èx-president de la Republica Francesa, Nicolas Sarkozy, es estat detengut aqueste dimars dins l’encastre de l’investigacion sus un afar de trafec d’influéncias que la mena lo parquet anticorrupcion. Dempuèi lo 26 de febrièr, Sarkozy es al centre de l’investigacion judiciària que tanben tracta d’un cas de violacion del secret d’instruccion. Sarkozy es estat transferit, dimars, a 8h del matin, a l’Ofici Central de Lucha contra la Corrupcion e las Infraccions Financièras e Fiscalas a Nanterre per èsser interrogat. La polícia judiciària cèrca de saber se Sarkozy teniá una ret d’informators dins lo sistèma judiciari, que li auriá ofèrt de donadas subre los procèsses judiciaris que lo podián afectar.
L’avocat de Sarkozy, Thierry Herzog, foguèt interrogat ièr amb lo jutge Gilbert Azibert e l’avocat general de la cambra criminala de la cort de cassacion, Patrick Sassoust. Los tres òmes foguèron interrogats dins l’encastre de la meteissa investigacion.
 
Segon çò qu’expliquèt Le Monde lo 8 de març, los investigators perseguisson una ret d’informators de la polícia e la justícia que, presumidament, filtrèron d’informacion a de familiars de l’èx-president francés dins los procediments legals que i es implicat.
Las suspicions comencèron amb una investigacion penala per corrupcion, iniciada pendent la prima de 2013 en mans dels jutges Serge Tournaire e René Grouman, sus lo possible sosten financièr de la Libia de Qadhdhafi a la campanha presidenciala de Sarkozy en 2007.

Per aquela investigacion, los policièrs sometèron a d’escotas telefonicas l’èx-cap d’estat a partir de setembre de 2013. E son aquelas escotas que revelèron que Sarkozy recebiá d’informacion subre las investigacions que l’implicavan.
 


_____
Libération: Nicolas Sarkozy en garde à vue
Le Monde: Affaire des écoutes: Nicolas Sarkozy placé en garde à vue