Lo president de la region curda d’Iraq, Mesûd Barzanî, assegurèt dimars passat a la BBC que lo sieu objectiu es l’independéncia: “Podèm pas contunhar sens avenir”. Barzanî a dich que faràn un referendum per saber se l’independéncia a lo sosten de la populacion: “O decidirai pas ieu, farem un referendum per saber çò que ne pensan las nòstras gents: respectarem lor opinion. Serà pas solament pels curds mas per totes los ciutadans”.
 
Lo cap curd concretizèt: “Pòdi pas dire una data exacta mas serà dins los meses avenidors. Nos en cal acordar al parlament”.
 
Barzanî afirmèt que la populacion curda participariá a la recèrca d’una solucion per la crisi grèva qu’afècta Iraq a l’ora d’ara. Fa doas setmanas, los jihadistas sunnitas provoquèron una seguida d’atacs e ara ja contraròtlan divèrsas zònas del país. “Iraq ara es ja partit, en practica”, çò diguèt Barzanî, ça que la, el assegura que lo sieu objectiu es l’independéncia.
 
“Lo nòstre estat nòu conviurà amb los vesins en patz e volèm pas èsser una menaça per degun”. Curdistan compren tanben de regions de Siria, d’Iran e de Turquia, mas lo referendum implicariá solament la region que fa partida a l’ora d’ara d’Iraq.