L’organizacion britanica per la proteccion de donadas e per la libertat d’informacion (ICO) a decidit de dobrir un dorsièr per determinar se Facebook enfranguèt cap de lei de proteccion de donadas dins sa polemica recèrca suls murs dels usatgièrs. Fa pauques jorns que se saupèt que l’an 2012 aquela entrepresa aviá fach dos estudis ont pendent una setmana aviá manipulat lo mur de gaireben 700 000 usatgièrs —çò es, un sus 2 500. La tòca èra de veire cossí afectava lo moral dels usatgièrs l’informacion que los lors contactes publicavan sus aquela ret sociala.
 
La recèrca foguèt menada per de cercaires de las Universitats de Cornell e de Califòrnia e èra dividida en doas experiéncias. Dins l’una, s’amaguèron las vidèos, los imatges, los comentaris e los ligams que contenián de messatges positius; s’agissiá de contrarotlar se los usatgièrs avián mens de reaccions positivas. Dins l’autra, se faguèt lo contrari: s’amaguèron los elements negatius del mur per saber se los usatgièrs tanben i respondián en consequéncia.
 
Se’n concluguèt que las emocions qu’exprimisson los lors contactes sus Facebook influïsson sul moral dels usatgièrs. Los estudis son estats durament criticats per fòrça avocats, activistas e politicians aquestes darrièrs jorns, pr’amor que los usatgièrs foguèron manipulats sens èsser prevenguts. Ara, Facebook es investigat per l’autoritat britanica, que lo poiriá forçar a pagar una multa de 300 000 èuros.
 
Facebook reagiguèt amb un comunicat oficial, non pas totun per presentar d’excusas, mas per dire que la recèrca servissiá per melhorar lo servici. Per contra, Adam D.I. Kramer, trabalhaire de l’entrepresa e coautor de l’estudi, expliquèt dins una nòta sul sieu mur que l’objectiu èra pas estat d’irritar degun. E se desencusèt: “Demandi perdon pel biais que lo rapòrt descriu la recèrca e l’ànsia qu’a causat”.