Ucraïna, lo co-organizator de l'Euro, ei entrat de bèra manèira en la competicion ger ser. Opausats a la Suècia qu'an pas jamèi encontrat en competicion oficiala, los ucrainians an pas mancat lor prumèra partida. Dens un estadi de Kiev sancerament jaune e blu, lo seleccionaire d'Ucraïna Oleg Blokhin avè causit de titularizar la legenda locala, Andriy Shevshenko e s'ei pas enganat.

 

Mes ei Zlatan Ibrahimović qui lo prumèr a obèrt la marca per Suècia sus un bon servici de Källström. Sonque tres minutas mei tard, Shevchenko, 35 ans, repreneva deu cap un centre de Yarmolenko per egalizar. Lo balon d'aur 2004 s'ei pas contentat d'aquò e a marcat un segon gol, tostemps deu cap, a l'òra de jòc.

 

En las darrèra minutas de la partida, l'ancian tolosan Elmander puish Melberg an mancat dus gols tot hèits, çò qui condamna donc Suècia a una prumèra desfèita, 2 a 1. Ucraïna per contra s'ei rassegurada dab aqueths tres punts, après partidas de preparacion a l'Euro mei que complicadas. Criticat abans aquera partida, Shevchenko s'ei lançat d'un biais ideau en aquèth Euro, qui serà sa darrèra competicion internacionala.

 

 

 

Autes còps, las confrontacions França – Anglatèrra representavan un somiu deu fotbòl europèu. En 2012, ei meilèu un duau d'outsiders, entre una equipa d'Anglatèrra qu'a pas ren ganhat despuish mei de 45 ans e una equipa de França enqüèra en fasa de reestructuracion après una darrèra copa deu monde calamitosa.

 

En aqueth Euro 2012 èran acostumats dinc adara a començar de partidas hòrt animats, çò qu'ei pas estat briga lo cas ger vrèspe a Donetsk. Shens Wayne Rooney, suspendut per las duas prumèras partidas de l'Euro, Anglatèrra s'ei concentrada tot prumèr sus una bona basa defensiva, los francés demorant tanben timidòts. Pas gran causa de sinhalar dinc a la mieja òra de jòc e un bon còp franc de Gerrard reprès peu defensaire mancunian Lescott, un còp de cap contra lo quau Hugo Lloris a pas podut ren.

 

Vexats d'estar menats, los francés an accelerat e sus una accion collectiva plan bastida, Nasri a egalizat dab un bon tir de l'exterior de la susfàcia. Maugrat una dominacion francesa dinc a la fin de la partida, l'escòre a pas cambiat e las duas seleccions se son quitadas sus un bon 1 pertot. L'equipa de França pòt totun regretar de pas aver près los tres punts contra una equipa d'Anglatèrra qui se contentava de conservar aqueth escòre de paritat. Un nul qui semblava tanben anar au seleccionaire Laurent Blanc qui a tardat abans d'ahortir l'ataca francesa.

 

Tot demora donc obèrt per las qualificacions en quarts de finala, e calerà pas que França ni Anglatèrra sosestiman una equipa d'Ucraïna qui, portada per tot un pòble, pòt relhevar son nivèu de jòc e har de miracles.




Matieu Casanòva