Quand l’Agéncia de Seguretat dels Estats Units (NSA segon sa sigla en anglés) interceptèt, de 2009 a 2012, de comptes d’Internet d’estrangièrs, d’aqueles qu’aviá lo permés legal de los susvelhar, reculhiguèt tanben las convèrsas de milièrs e milièrs d’usatgièrs comuns d’Internet, tant dels Estats Units coma d’endacòm mai. Aital o a revelat una analisi menada pel jornal Washington Post. De fach, lo jornal calcula que nòu comunicacions interceptadas sus dètz èran d’internautas comuns, e non pas de personas visadas per la vigilàndia dels servicis d’entresenha.
 
Malgrat qu’aquelas comunicacions contenguèsson d’informacions personalas e sens utilitat pels analistas de l’NSA, l’agéncia ne retenguèt la majoritat. Entre los 160 000 messatges e gaireben 8000 documents d’11 000 comptes d’Internet filtrats fa un an per Edward Snowden, e analisats pel jornal, i a fòrça ”istòrias d’amor e desamor, d’abituds sexualas illegalas, de crisis mentalas, de convèrsas politicas e religiosas, d’angoissas economicas e d’esperanças trencadas. La vida quotidiana de mai de 10 000 usatgièrs qu’èran pas dins la lista dels objectius de vigilància dels Estats Units”. I a tanben mai de 5000 fotografias privadas.
 
Lo jornal apond qu’aquel espionatge de tròp, en qualque cas, donèt de pistas de valor per l’entresenha, coma la revelacion d’un possible programa nuclear secret a l’estrange.
 
Segon la lei, la vigilància de l’NSA deu solament visar de ciutadans estrangièrs que se tròben en defòra dels Estats Units, levat se i a un òrdre judiciari especial.