Californication, la sèria acidocomica estatsunidenca nascuda en agost de 2007, s’es clavada aqueste 29 de junh. Produccion de la cadena Showtime, lo ròtle màger i es tengut per l’actor David Duchovny qu’interprèta Hank Moody, un escriveire urban desenlusit, amorós coma un fat de sa dòna Karen mas que se pòt pas empachar d’anar femnassejar dins lo mitan artistic e literari de Los Angeles. Los episòdis mòstran un òme adorable, papà afectuós, plen de succèsses dins son trabalh, mas incapable de menar una vida rengada. Malgrat totes los sieus esfòrces, sistematicament, la crida de la californicacion es mai fòrt que la siá volontat.
 
Pendent sèt sasons de dotze episòdis de mièja ora cadun, Californication s’es establida coma una sèria culta per tot lo planeta. Es distribuida dins 49 estats suls cinc continents e una comunautat de fans s’es desvolopada. En librariá, quitament se pòt trapar lo roman God hates us all virtualament escrit pel personatge Hank Moody.
 
La sèria compòrta cinc personatges principals: l’escriveire Hank Moody, sa femna e sa filha e lo sieu agent Charlie Runkle (jogat per Evan Handler) e sa femna. David Duchovny es conegut per aver jogat lo ròtle de l’enquestaire Mulder dins la sèria X-Files. Per sa prestacion dins Californication, obtenguèt un Golden Globe Award coma melhor actor. Es una recompensa meritada ja que fa un jòc tot en finesa e en generositat.
 
La mesa en scèna es tipicament la d’un fulheton de trenta minutas, valent a dire que tot passa per l’eficacitat de l’imatge e del scenari, lo ritme e la sinceritat del jòc dels actors. En 84 episòdis, Californication daissarà lo sovenir d’una òbra telivisuala iconoclasta dins la forma e plena d’umanisme dins lo fons, qu’a sabut trepejar en permanéncia a la termièra de la provocacion e de la convenença e daissar l’espectator amb lo sorire als pòts.
 
En Occitània es difusada per las cadenas M6 (estat francés), FDF (estat espanhòl) e Italia 1 (estat italian). La sèria es albergada dins fòrça sits Internet.
 



TL