O aviá anonciat dimenge una enquèsta realizada per una entrepresa consultanta dels Estats Units. La comission electorala afgana o a anonciat ièr: Ashraf Ghani auriá ganhat las eleccions.

Pels afgans aquò comença d’èsser un pauc long. La campanha electorala foguèt lançada lo 2 de febrièr. Lo primièr torn de las eleccions  foguèt lo dissabte 5 d’abril. Lo candidat mai votat foguèt alavetz Abdullah Abdullah, l’èx-ministre afgan dels afars exteriors, amb lo 45% dels vòtes; lo segond foguèt l’èx-ministre de las finanças Ashraf Ghani Ahmadzai, amb lo 31,56%. Mas ara, al segond torn celebrat lo 14 de junh, auriá ganhat l’oficialista Ashraf Ghani, amb lo 56,44% dels sufragis.
 
Mas son de resultats preliminars encara. Los resultats seràn definitius pas que lo 22 de julh, quora seràn confirmats per la Comission Electorala Independenta (CEI).
 
Per ara cap dels dos candidats a fach de declaracions. Totun, al primièr torn, Abdullah Abdullah, qu’aviá dirigit un movement antitaliban, aviá denonciat que lo procès electoral èra confle d’irregularitats, que volián favorizar lo sieu rival politic. Aviá acusat dirèctament Hamid Karzai d’organizar aquela fraudariá massissa en favor de son successor. Abdullah aviá menaçat de reconéisser pas los resultats electorals. E aquò, dins un país amb la tradicion democratica d’Afganistan, pòt plan voler dire prene las armas.
 
Ghani e Abdullah an tengut una longa e reünion que s’acabèt plan de matin sens cap d’acòrdi.
 
Los talibans son un gròs problèma encara. Ièr moriguèron almens 16 personas, dont 4 soldats de l’OTAN, 2 policièrs afgans e 10 civils, en un atemptat suicidari dins la província de Parwan, al nòrd-èst del país. Los talibans an revendicat l’atemptat per mejan de Twitter, a an informat qu’un membre del movement taliban a fach espetar lo sieu gilet explosiu.
 
E pels afgans, en mai d’aquò i a la crisi. La màger part de las tropas internacionalas d’Afganistan son tornadas dins sos païses. E aquò’s pecat per la màger part dels afgans, per çò que las tropas internacionalas èran una granda sorsa d’emplecs e de revenguts. E tanben, la màger part de las entrepresas, organismes, organizacions internacionalas... son a l’espèra dempuèi febrièr de 2014, abans de contunhar sos projèctes vòlon saber de qué se va passar un còp acabadas aquelas longas eleccions.
 
Afganistan en chifras
 
Lo taus d’analfabetisme d’Afganistan es un dels mai elevats del Mond. Lo 34% de la populacion adulta sap pas legir ni escriure. Dins la campanha lo taus pòt montar al 74%, mai que mai demest las femnas.
 
Composicion etnica: D’una populacion estimada e 20 269 000 personas, las etnias principalas son: los pashtos, 52,3%; los tatgics, 20,3%; los ozbècs, 8,7%; los hazāras, 9%.
 
Religion: 84% de musulmans sunnitas; 15% de musulmans shiitas; sikhs e indós constituisson l’1% restant.
 
Probabilitat de vida: 46 ans.
 
Mortalatge infantil: 257 pichons sus 1000 morisson abans de far los 5 ans.
 
Abdullah Abdullah es filh de maire tatgica e de paire pashto. Es politic e doctor en medecina.
 
Ashraf Ghani Ahmadzai es pashto, en mai de politic es antropològ, e coma antropològ a trabalhat a l’universitat e a la Banca Mondiala. Es considerat una persona onèsta. Servís d’exemple que, coma ministre de las finanças, remandèt los foncionaris corromputs, e tanpauc volguèt pas pagar los salaris de l’armada d’Afganistan fins qu’aguèt en mans la lista de totes los soldats, per çò que supausava que las chifras del personal de las fòrças armadas èran estadas artificialament confladas.




Manèl Zabala