La tresena edicion del Festival tolosan occitano-catalan Sèm e serem arriba ongan un mes mai tard que d'abitud. Segon Daniel Perissé, director del festenal, "nos diguèrem que voliam pauc a pauc ensajar d'aver, a Tolosa, un festival d'estiu occitan, del meteis biais qu'a Rodés an l'Estivada, a Pau lo Hestiv'òc...".

 

Alavetz, lo festenal començarà dijòus 28 de junh a 19h a l'Ostal d'Occitània, amb un concèrt doble del jove artista occitan Primaël e lo cantaire catalan Enric Hernàez. "Per la tresena edicion avèm dos objectius: que lo festenal siá sentit pels joves coma una fèsta populara, e, doncas, gratuita; e que capite de far sortir la musica occitana dins las carrièras e la bote al nas dels tolosans", apond Perissé.

 

Es per aquò, que la còla del Sèm e serem an decidit de programar una dimenjada de fèsta populara lo 6 e 7 de julh, amb doas grandas seradas sus la Plaça Naut Bernat. Divendres 6 de julhet i trobarem los catalans Estúpida Erikah e lo mèstre tolosan Rachid Benallaoua, membre d'Origines Contrôlées. Dissabte 7 de julhet, la fèsta contunharà amb los montpelhierencs Mauresca Fracàs Dub e l'espectacle de creacion Ò.K! Brigada Internacionala.

 

La programacion del festenal se completa amb de noms coma lo valencian Feliu Ventura, lo catalan Albert Freixas, l'occitan Djé Balèti, o lo catalan Cesk Freixas, e, encara, una serada de scèna obèrta occitano-catalana amb Rafèu Sichel (Occitània) e Xavier Rota (Catalonha) lo 5 de julhet a l'Estanquet de la Portièra.

 

Ò.K! Brigada Internacionala es lo recampament de la musica catalana e occitana, amb 8 musicians occitans e catalans reconeguts, amassa sus scèna pel meteis espectacle.

 

Catalonha e Occitània. Un ponhat de cançons e de luchas partejadas dels Alps italians a Bordèu, e de Limòtges a Guardamar. Lo 10 de març passat lo Festival Barnasants presentava dins la sala Luz de Gas de Barcelona una coproduccion de Barnasants, Estivada de Rodés e Sèm e serem, l'espectacle Ò.K! Brigada Internacionala: lo grop Badabad'Òc, amb quatre voses vengudas de pertot: Joan Garriga, de la Tròba Kung-fú, Gigi de Nissa dels Nux Vomica, lo Stefano de Lo Seriòl de las Valadas, e lo catalan Carles Belda, coma d'abitud. Un sol empont e tres ingredients: l'union fa la fòrça, la fèsta fa la jòia e lo que canta lo sieu mal encanta. Tot aquò se servís plan mesclat e saquejat dins un nòu espectacle: Ò.K! Brigada Internacionala. Totes amassa reprendràn las cançons popularas e las cançons d'autor mai emblematicas dels dos costats dels Pirenèus, per ne far una fèsta e vos convidan a i participar de la votz, de l'agach, de las mans e de las cambas! Seràn lo 7 de julhet a Tolosa per nos far dançar, amb de suspresas e de convidats fòrça especials, coma los amics Carles Biano e Jordi Palau d'Orxata Sound System, l'acordeonista Rafèu Sichèl o l'improvisador Ferriòl Macip. Una coproduccion dels festivals Estivada de Rodés, Barnasants (Barcelona) e Sèm e serem (Tolosa).

 

 

 

Segon lo director artistic de Sèm e serem, Marçal Girbau, "sèm plan uroses de l'acòrd de cooperacion que presentèrem al mes de març, entre los tres festivals l'Estivada, Barnasants e Sèm e serem. Per nosautres, l'estrategia d'avesinar culturalament Catalonha e Occitània non es pas solament una question de romantisme istoric, es tanben una question de mercat, especialament cultural. Volèm balhar als artistas occitans la possibilitat de s'exprimir e se vendre als Païses Catalans, e al revèrs, nos agradariá que los artistas catalans pòscan intrar dins lo mercat cultural occitan".