An empedit a Refat Çubarov d’intrar dins la peninsula de Crimèa en rason d’“activitats qu’incitan a l’asirança etnica”. Lo cap tatar a denonciat la “granda injustícia” que Moscòu comet en Crimèa. Las autoritats tataras denonciaràn Russia a la Cort Europèa dels Dreches Umans.

Las autoritats russas an enebit a Refat Çubarov, president del Meclis (conselh executiu dels tatars de Crimèa), d’intrar en Russia pendent los cinc ans que venon. La procuraira generala de Crimèa, Natalia Poklonskaia, comuniquèt a Çubarov la mesura sus la frontièra entre la peninsula e Ucraïna, ont lo cap tatar èra anat participar a un congrès, çò explica l’Agéncia Crimeana de Nòvas (QHA).
 
La nòta que Poklonskaia liurèt a Çubarov justificava la decision amb l’argument que lo president del Meclis se consagra a d’“activitats qu’incitan a l’asirança etnica”, çò ditz RFE-RL. Lo primièr ministre de Crimèa, Sergei Aksionov, sostenguèt la decision, segon çò que rapòrta ITAR-TASS: “Totes los qu’ensagen uèi de semenar lo conflicte etnic dins la Republica de Crimèa deurián èsser isolats e o seràn”, çò diguèt.
 
Çubarov afirma categoricament qu’el, e quitament pas lo Meclis, son pas brica colpables d’aquelas acusacions, e considèra que la decision es una nòva mòstra que la Federacion Russa cèrca de metre fin als dreches collectius del pòble tatar de Crimèa. L’enebicion es “una petita part de la granda injustícia que se debana en Crimèa”, çò diguèt Çubarov.
 
Segon The Moscow Times, çò qu’auriá provocat l’òrdre d’exili per Çubarov es lo títol d’una conferéncia prononciada pel cap tatar sus l’autodeterminacion del pòble tatar en Crimèa.
 
De son costat, lo govèrn ucraïnés a dich que la decision rebat la politica “chauvinista” de Russia “contra los tatars de Crimèa”.
 
 
Lo segond cap tatar en exili en tres meses
 
La mesura contra Çubarov es la meteissa que Russia dictèt en abril passat contra l’istoric cap dels tatars de Crimèa, Mustafa Qırımoğlu (tanben conegut coma Mustafa Cemilev). Fa doas setmanas, Qırımoğlu anoncièt que portariá a la Cort Europèa dels Dreches Umans “las violacions dels dreches umans” que, segon el, Russia comet en Crimèa. Qırımoğlu soslinhèt que los tatars qu’acceptarián pas lo ciutadanatge rus serián considerats estrangièrs dins lor país istoric.
 
Lo Meclis cridèt al boicòt del referendum de secession que las autoritats de Crimèa celebrèron en març passat, e que son resultat foguèt l’annexion de la peninsula a Russia. Las autoritats tataras, qu’èran partisanas de manténer la peninsula dins Ucraïna, argumentan que Russia ni respècta ni respectarà pas los dreches nacionals dels tatars de Crimèa.
 
 
 
 
 
Aqueste article ven del jornal catalan Nationalia, amb qui Jornalet a un acòrdi de cooperacion.