Amina Asbui, abans coneguda jol chafre d’Amina Tayler, es una de las caras mai vesedoiras del feminisme dins lo mond musulman. Èra estada militanta del grop Femen, mas l’abandonèt en agost de 2013 en lo jutjant islamofòb.

La jove a contat dins sa pagina de Facebook que, dimenge 6 de julhet, a 5 oras del matin, se trobava dins l’estacion de mètro de Place de Clichy, quand un jove, tunisian el tanben, la venguèt saludar per li manifestar son sosten e li prenguèt la man. Mas aquò èra un tracanard, lo jove la saquèt a l’exterior de l’estacion per la fòrça, defòra esperavan quatre barbuts que li sautèron dessús e li diguèron que l’anavan violar: “serà una bona accion als uèlhs de Dieu”. Puèi, al mièg de la carrièra, li rasèron las cilhas amb una lama de rasor, e tanben qualque flòta de cabel, per çò que “s’ameritava pas la beutat que Dieu li aviá donada”.

Amina Asbui a fach sa denóncia de violéncia per agression amb emplec o menaça d’arma blanca.   


Los passants se’n passèron

Degun l’ajudèt pas. Amina a explicat que foguèt pas liberada fins que lor prometèt que vendriá una bona musulmana e lor aguèt recitat qualque verset de l’Alcoran.

Amina Asbui, de 19 ans, passèt un pauc mai de dos meses en preson en 2013 per aver chimarrat lo mot Femen al mur del cementèri de Cairoan, per fin de protestar contra lo congrès del partit salafista Ansar Ash Sharia (partisans de la sharia).

Menaçada de mòrt per los islamistas, puèi sequestrada per sa familha, la jove a quitada Tunisia per passar lo bachelierat dins un licèu parisenc.




Manèl Zabala