Actualitats
Merah auriá descobèrt qu’èra una “talpa” dels servicis franceses dins los movements jihadistas
Un jornal argerian a publicat d’enregistraments que poirián provar que Mohamed Merah foguèt traït pels servicis d’entresenha franceses
Mohamed Merah auriá descobèrt just abans la siá mòrt qu’un dels sieus amics, que lo pensava jihadista, èra un agent de la Direccion Centrala de l’Entresenha Interiora (DCRI per la siá sigla en francés), segon lo jornal argerian Ash Shuruq (Echorouk en transcripcion a la francesa), que publiquèt ièr la transcripcion de doas vidèos ont Merah s’enregistrèt en parlant per telefòn abans d’èsser tuat.
Dins una de las vidèos, Merah afirma qu’es “innocent”. “Veni de descobrir que lo mieu melhor amic Zohair trabalha pels servicis secrets franceses”. Dins la transcripcion dels tèxtes publicats pel jornal argerian, se pòt legir las convèrsas entre Merah e aquel tal Zohair que ditz: “Mohamed, sortís e rend-te, degun te farà cap de mal, me coneisses e coneisses ma paraula”. E Merah respond: “Pòdes anar al diable espècia de traite, perqué me volètz tuar uèi? Qu’es çò qu’ai fach ieu? Ai pas res fach, ai pas tuat degun. Ès tu que m’as menat en aquela situacion e t’o perdonarai pas”. Merah apond: “M’as mandat en Iraq, en Paquistan e en Siria per ajudar los musulmans e après apareisses coma un criminal e capitani de l’Entresenha, te pensavi pas aital, jamai!”.
De l’autre costat de l’aparelh, l’òme confirma: “çò que s’es passat, s’es passat, ara çò que cal es que ieu te salve la vida e te tire d’aquel afar, te rendes o me daissas intrar per recuperar las tiás armas?”.
Ara ven a la justícia francesa de descobrir s’aqueles enregistraments son veridics, çò que confirmariá la denóncia del paire de Mohamed Merah. Las siás avocatas, Zahia Gerrache Mokhtari e Isabelle Coutant-Peyre, pensan que Merah foguèt una “talpa” dels servicis franceses dins los movements jihadistas, qu’escapèt als sieus manipulaires.
Se sap pas encara qual es l’origina dels enregistraments e cossí son arribats al jornal argerian.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 "Hèitas-hèitòtas", aquò qu'es bròi !
Malerosament Jornalet non a es recorsi des auti jornaus; s'agís encara d'ua equipa petita de benevòls. Totun, qu'ensajam de cercar d'informacions per tot, e de'n partatjar. E de vos convidar de participar, entà bastir un hilat sociau d'informacion.
Entà bastir aqueres quate linhes sus er ahèr Merah, era pena mès grana qu'ei estat de sajar de compéner er arabi, per poder liéger plan çò que publiquèc eth jornau argerian Ash Shuruk.
N'i a pas sonquet lo Jornalet, mès tanben la Despacha deu Mieidia, qui daisha pas lo tròç. Sabi plan qu'ei un jornau meilèu virat de cap a las hèitas-heitòtas, mès qu'an un dorsièr sus l'ahar deus bons. Pareish clarament que lo Merah èra pagat e utilizat peus servicis francés e qu'a cargat per d'autes. Demòran enqüèra hèra causas de descobrir e d'esclarir, sustot deu costat de l'ataca de l'escòla. La mair de Sandler (lo "rav" de l'escòla) n'ei pas qui-que-sia, mès tribalha a la Nacions Unidas. Benlèu un ahar de pression internacionau. N'èm pas sonque a la debuta.
Los jornalistas franceses, ara, an de qué bartavelar sus los toíts del Castèl. An pas léser de far d'enquestas longas e menimosas sus de sicuts pas pro glamors.
Hèra interessant, se digó: "N'èi pas hèit arren, n'èi pas tuat arrés !" E d'aqueste temps, qué hèn eths jornalistas d'investigacion de la premsa francesa ? Urosament qu'avem eth Jornalet entà seguir er ahar !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari