Lo començament de l’estiu es marcat per una pojada de la tension dins lo conflicte israèlopalestinian. Als tirs de roquetas que los islamistas de l’Hamas mandan sus Israèl despuèi la Lista de Gaza respondon las bombas de l’armada israeliana, amb las victimas innocentas qu’aquò implica. En venjança de l’assassinat en junh de tres joves israelians, de colons extremistas matèron de biais atròç un palestinian de 15 ans, Muhammad Abu Khdeir.
 
Tanben son, ara per ara, una revirada, las negociacions per terminar la guèrra amb la reconeissença per Israèl d’una Palestina independenta e la fin de la colonizacion illegala josieva en Cisjordania.
 
En Israèl, totun, puèja una contestacion pacifista contra la politica bellicista e militarista del govèrn de Benjamin Netanyahu. L’esquèrra, a l’entorn del partit comunista, organiza regularament dins tot lo país de manifestacions de protèsta. Per exemple, lo 3 de julhet passat, de milierats de militants passèron per las carrièras de Tel Aviv per exigir una solucion diplomatica e la coexisténcia dels josieus e dels arabis, e denonciar lo ‘‘racisme’’ del govèrn d’Israèl.
 
En mai d’aquò, la contèsta s’espandís suls malhums socials, en particular Facebook, ont s’es creada una pagina israeliana que son títol ditz en ebrieu ‘‘Causissi la patz’’. I difusan per la patz de messatges mai que mai en ebrieu, arabi e anglés, e de fotografias de gents amb de pancartas del contengut pacifista. En una setmana lo nombre d’inscriches despassa ja los 13 000.
 
Après mai de mièg sègle de conflicte, lo pacifisme poirà enfin véncer lo militarisme?




GJB