Lo terren de fotbòl de Maracanã, a Rio de Janeiro, aculhiguèt ièr la finala entre las esquipas d’Alemanha e d’Argentina de la Copa del Mond de fotbòl en Brasil. Tot lo Mond espièt çò que se passèt dins aquel estadi monumental. Mas subre çò que se passa defòra, practicament degun pausèt pas son atencion. Gràcias al documentari web neerlandés Who Are the Champions?, pr’aquò, se pòt descobrir la vida d’un dotzenat de cariòcas que demòran a l’entorn de Maracanã e cossí los a afectat lo mondial.
 
Un vendeire de cacauets, una cofaira, una guida toristica, un gardian de seguretat e un captaire son qualques unes dels personatges qu’explican lors cadajorns, sovent complicats, dins aqueste sit web espectaclós, que jòga tanben magistralament amb los imatges e lo son ambient.
 
Un dels testimònis es lo proprietari d’un petit bar de Metrô-Mangueira, una favela qu’es anada en creissent las darrièras trenta annadas, a sonque cinc cents mètres de Maracanã. Dempuèi l’an 2010, las autoritats decidiguèron de la desrocar malgrat l’oposicion d’una partida de la populacion, a la quala ofriguèron tres opcions, coma o explica dins lo documentari E. Freitas: replaçament dins una autra favela a trenta quilomètres, l’assisténcia en centres d’aculhida o demorar per carrièras.
 
Freitas, un dels resistents de la favela, exprimís dins lo documentari sa colèra contra las autoritats e ditz a las camèras, abans la Copa del Mond, qu’esperava que l’esquipa de Brasil foguèsse lèu-lèu eliminada…

Who Are The Champions? Teaser de Submarine Channel sus Vimeo.