Lo president francés, François Hollande, foguèt fiulat dins la desfilada de la fèsta nacionala francesa que, coma cada 14 de julhet, se celèbra d’un biais militarista. De militars de totas las armadas desfilèron per carrièras a París en mostrar las armas de guèrra. Quand Hollande descendiá los Camps Elisis darrièr un veïcul militar, a mai d’una represa, s’entendèt de fiulets del public qu’assistiá a l’eveniment, segon una nòva e un vidèo que publica Le Huffington Post.
 
Es pas lo primièr còp que lo cap de l’estat francés es fiulat, mai que mai pel nombrós collectiu omofòb opausat al maridatge per totes. Mas ongan la desfilada es venguda polemica perque se fiulèt tanben los representants de las armadas argeriana e vietnamiana. Aqueles darrièrs fiulets xenofòbs fan pensar que los fiulets vendrián de l’ultradrecha francesa, qu’a crescut après las eleccions al Parlament Europèu.
 
Pasmens, segon una jornalista d’Europe 1 qu’èra sus plaça, los intermitents de l’espectacle serián tanben a l’origina dels fiulets. Aquel collectiu protèsta dempuèi qualques meses en oposicion al projècte del MEDÈF, l’organizacion patronala francesa, que prepausa la desaparicion particulara dels intermitents de l’espectacle per los fondre dins lo regim general de l’assegurança caumatge.
 
La polícia detenguèt qualques assistents per perturbar la desfilada als bòrds dels Camps Elisis. 




Hollande sifflé lors du défilé du 14 juilletper LeHuffPost