L’escrivana sud-africana Nadine Gordimer (Springs, Gauteng, 1923) moriguèt diluns passat dins sos nonanta ans. Ganhèt lo Prèmi Nobel de literatura en 1991 e foguèt una de las voses mai remarcablas contra lo regim de l’apartheid, contra la pauretat e en favor dels dreches umans. Es autora de My Son’s Story (L’istòria de mon filh, 1990) e de The Conservationist (Lo conservator, 1974), entre fòrça mai de romans.
 
Son darrièr libre, No Time Like the Present —publicat en francés per Grasset en 2013 coma Vivre à présent— parla de la decepcion de la Sud-Africa actuala e retrai Jacob Zuma coma un autentic corromput. Dins sas darrièras entrevistas, Gordimer se mostrèt leiala e engatjada coma totjorn e denoncièt l’estat actual de la situacion del país. Li agradava pas qu’òm diguèsse que Mandela èra estat ingenú. Ela interpretava qu’èra pas un problèma d’ingenuitat, mas que s’èra consagrat a combatre per tornar la dignitat als negres e aviá pas previst çò que se passariá.