Carla Dauden es una jove realizaira de cinèma brasilièra qu’arunan venguèt famosa per un vidèo qu’explicava, amb d’argumentacions plan criticas, perqué pensava pas d’assistir a la Copa del Mond de fotbòl de Brasil. Lo filmet, entitolat No, I’m not going to the World Cup, recebèt mai de quatre milions de vesitas sus Internet. Ara, la Copa del Mond acabada, a fach un autre vidèo qu’afirma que la desbranda per 7-1 amb Alemanha es pas brica la chifra mai umilianta per Brasil.
 
Pendent cinc minutas e mièja, Carla Dauden expausa davant la camèra perqué aquela Copa del Mond es venguda la copa de l’exclusion sociala en seguida de las expulsions de nombrosas personas que demoravan a l’entorn dels estadis, la de l’empresonament arbitrari de fòrça manifestants, la de la mòrt dels obrièrs de la construccion dins los trabalhs dels estadis... Tot aquò, çò explica, per generar encara mai de beneficis a la FIFA, que portarà ara cap a Russia la copa de 2018. E, mentretant, lo Mondial a daissat la majoritat dels brasilièrs amb los meteisses problèmas socials qu’avián abans.
 
Amb tota l’atencion dels mèdias concentrada dins los estadis, Dauden critica cossí s’es desviada l’atencion dels tèmas reals de la societat brasilièra, amb la pauretat davant.
 
Es de soslinhar tanben Who are the Champions?, un documentari web que parla amb un dotzenat de vesins de Maracanã e qu’examina cossí los afècta lo fach de viure al costat del principal estadi de fotbòl brasilièr.