Dimenge de ser ataquèron amb de cotèls tres esportius de l’esquipa de rugbi de Clarmont-Ferrand. Julien Pierre, Aurélien Rougerie e Benjamin Kayser tornavan a lor ostalariá a Milhau (Larzac) ont son a preparar la sason que ven, quan foguèron agredits per un desenat d’individús provesits de machets e de sabres a jaba.
 
Las primièras quatre detencions que la polícia a fach permeton de saber que son de joves de Milhau “coneguts pels servicis de polícia”. Dimenge de ser, los detenguts foguèron meses en gàrdia a vista.
 
L’agression se passèt vèrs 2 oras del matin, quand las victimas tornavan d’una serada dins un bar-discotèca de la vila. Quand los autres membres de l’esquipa se sarrèron, los agressors quitèron de far mal e fugiguèron.
 
Segon de fonts de l’enquèsta policièra, “un dels joves clarmonteses s’interpausèt, sembla que sens violéncia, entre una joventa e son companh qu’aviá el una actitud agressiva envèrs ela”, segon çò que rapòrta L’Équipe. El, vexat per l’intervencion de l’esportiu auvernhat, l’esperèt amb mai de mond a la sortida de la discotèca.
 
Los tres jogaires son espitalizats amb de feridas d’arma blanca. Julien Pierre deurà èsser operat perque un de sos muscles es estat seccionat.
 
Lo club a fach sa denóncia a la justícia.