Lo combat a començat en dehòra de l'estadi de Varsòvia, dab afrontaments entre suportaires polonés e rus e interpelacions per la polícia. Cau saber que son pas remirablas las relacions entre aqueths dus país, una rivalitat istorica recentament ahortida per la mòrt deu president polonés Lech Kaczyński en Russia, dens condicions un pauc estranhas.

 

Suu terren, las duas equipas an sabut se respectar, mei o mens. Los rus favorits son totun eths qui an concedit las prumèras ocasions seriosas d'aquera partida. Après vint minutas de jòc, Polanski marca, mes lo gòl ei refusat per l'arbitre per posicion de hòra jòc. Un còp passat l'auratge, Russia contra ataca e Dzagoev balha l'avantatge a son equipa d'un còp de cap. L'atacant rus, que s'ei copat l'artelh au mes de març passat, marca dejà son tresau gòl de la competicion.

 

A la pausa, Polonha èra menada e donc forçada de reagir per pas estar eliminada. A l'òra de jòc, Błaszczykowski profieita d'un navèth balon perdut per Arshavin, elimina dus defensors rus e plaça una frapa enrotlada en las caujas de Malafeev. En seguir Russia semblava pas en capacitat d'accelerar lo jòc ; Polonha èra mei volontària mes mancava de finicion en ataca. 1 pertot, escòre finau. Una ocasion mancada per Russia qui se podèva qualificar directament gèr ser. Per Polonha, lo darrèr encontre de pora serà decisiu.

 

 

 

Com ditz lo provèrbi fotbalistic, calèva pas arribar en retard gèr ser a l'estadi de Wrocław per assistir a Grècia – Republica Chèca. Lo chècs, umiliats per Russia au prumèr encontre, devèvan reagir per aver l'escadença de's qualificar. Tres minutas sonque après lo debut de la partida, Jiracek, lançat dens l'axe de la defensa grèga, trompava d'una bona frapa Chalkias, lo guardian grec pas hòrt inspirat sus aquera accion. Ne l'èra pas mei 4 minutas mei tard, quan Gebre Selassie centrava per Pilar qui marcava. A 2 a 0 après quauquas minutas de jòc, los chècs se son contentats de gerir l'escòre mentre que los grècs, malurós contra los polonés divés passat, ensajavan peniblament de se virar cap a la susfàcia chèca.

 

Après la pausa, ei una error de las bèras deu guardian chèc, Petr Cech, qui a tornat lançar la partida. En deishar escapar lo balon, a permetut a Grècia de redusir la marca e d'esperar un pauc. Mes los grecs ne presentan pas a d'aqueth Euro un potenciau ofensiu sufisent per inquietar las defensas deus adversaris, a l'imatge d'un Samaras tròp brolhon e pas pro decisiu. Per pròva, Grècia a tirat sonque dus còps au but gèr. Dab aquera victòria 2 a 1, la Republica Chèca jogarà sa qualificacion contra lo co-organizator de l'Euro, Polonha. Per Grècia, serà mei que complicat: una victòria – pauc probabla – contra Russia l'asseguraré quitament pas de demorar en la competicion.




Matieu Casanòva