Aqueste còp, los milierats de crestians assirians que demoravan encara dins la ciutat de Mossol la fugisson despuèi divendres. L’Estat Islamic en Iraq e Siria, o simplament Estat Islamic, organizacion jihadista que se revendica coma un estat e que son cap se proclamèt lo 29 de junh passat califa, valent a dire cap suprèm dels musulmans e successor de Maomet,  obtenguèt de victòrias importantas en Siria e en Iraq, e ara contraròtla la vila. I pausèt un ultimatum a la populacion crestiana, implantada despuèi aperaquí 1 500 ans: se dissabte 19 de julhet se convertissián pas a la religion musulmana o acceptavan pas de se sometre a la jizia, tribut islamic que lo non-musulman pòt aver de pagar en tèrra d’islam, lor caliá quitar Mossol o morir.

Segon un gèst que fa pensar al que los nazis faguèron als josieus fa mai de 70 ans, los soldats de l’Estat Islamic aviá marcadas las pòrtas dels ostals dels crestians per los identificar melhor e lor avián distribuit de fulhets ont cabián de menaças. Los crestians se resignèron a l’exili, e tanben perdèron lors bens, confiscats pels jihadistas.

En Iraq e en Siria, pr’amor de las guèrras civilas, los crestians orientals patisson una situacion de mai en mai malaisida e, secutats, son sovent obligats de fugir, mentre que sembla que de joves occitans musulmans se fagan jihadistas en l’Orient Mejan. 
 
 
 
GJB