La reforma de la lei de las regions de França prevei que los departaments individuals pòscan cambiar de territòri entre 2016 e 2019. Caldrà que tres cinquens dels deputats de cada conselh regional o apròven. Los partits e los movements bretonistas critican los deputats socialistas bretons.

Lo projècte de lei sus las regions de la Republica Francesa fa de passes endavant dins lo Parlament. La nòrma serà pas alestida abans la davalada, mas lo scenari es de mai en mai clar. E dins aquel encastre, la reünificacion de Bretanha deurà esperar lo periòde 2016-2019. Mas solament s’o vòlon los deputats de la region dels Païses de Léger que, previsiblament, auràn drech de metre lo vèto per empedir que lo departament del Léger Atlantic se reünifique amb Bretanha.
 
Los partisans de la reünificacion argumentan que los territòris del Léger Atlantic avián fach partida de Bretanha dempuèi l’Edat Mejana fins a la Segonda Guèrra Mondiala, e asseguran que contunhan de formar una unitat culturala. De mai, dison que Nantas (lo capluòc del Léger Atlantic) formariá un ais economic coerent amb las doas autras vilas bretonas principalas (Roazhon e Brèst).
 
A l’ora d’ara, lo departament del Léger Atlantic se tròba dins la region dels Païses de Léger. Amb la redefinicion de la mapa territoriala de França, s’èra dobèrta la pòrta al transferiment d’aquel departament a Bretanha. La pòrta es dobèrta, mas pauc. D’en primièr, divendres passat, los deputats de l’Assemblada Nacionala ratifiquèron çò que s’èra ja anonciat anteriorament: dins la primièra fasa del redessenh de la mapa territoriala, cap de departament poirà pas quitar sa region per intrar dins una autra. Es a dire, que se pòt solament fusionar de regions entièras, mas la majoritat dels representants bretons refusan de fusionar Bretanha amb totes los Païses de Léger.
 
Ça que la, i aurà una segonda fasa de modificacion de la mapa: entre 2016 e 2019 se poirà cambiar los limits de las regions s’un departament vòl passar d’una a una autra. Mas serà pas aisit: segon lo rapòrt presentat pel deputat Carlos da Silva, s’exigirà una majoritat de tres cinquens dels deputats del conselh del departament, e tanben dels dos conselhs regionals implicats. Es a dire, qu’ipoteticament, lo 41% dels deputats dels Païses de Léger poirián blocar la reünificacion bretona s’o desirèsson, e mai se lo 100% dels deputats del Léger Atlantic votèsson en favor.
 
 
A la tardor, mai de debat parlamentari
 
Aquel anonci es pas arribat amb gaug als partits e als movements que defendon la reünificacion de Bretanha dempuèi d’ans. Lo collectiu 44 Breizh remembra que, après las vacanças, lo tèxt lo cal encara discutir dins lo Senat, e qu’ailà lo projècte de lei poiriá èsser tornarmai modificat. S’aquò se passèsse pas, 44 Breizh ditz que se demostrariá “l’incapacitat dels representants de Bretanha de far avançar la situacion a París” e demorariá clar que “la solucion passa per la presa de decisions aicí en Bretanha, per exemple a travèrs de l’organizacion de referendums locals”.
 
Lo Partit Breton e lo Movement Bretanha Progrès an parlat contra los representants bretons del Partit Socialista: los an acusat de “coardiá” per defendre pas pro lo besonh de la reünificacion dins lo Parlament francés e de voler defendre lors zònas d’influéncia exclusiva. De son costat, l’Union Democratica Bretona demanda la convocacion d’un referendum per que los ciutadans del Léger Atlantic pòscan decidir dins qual territòri vòlon èsser.
 
 
 
 
 
Aquesta nòva es adaptada de Nationalia, amb qui Jornalet a un acòrdi de cooperacion.