Alemanha – País Baish: l'afica èra bèra suu papèr, l'èra tanben suu terren. Se ditz que i a pas de grana equipa shens gran atacant, s'ei confirmat gèr ser dab Mario Gómez, alias Super Mario. Arron un debut de partida un pauc timidòt de la Mannschaft, Gómez a obèrt la marca peus alemands après un gèste tecnic remirable dens la susfàcia olandesa. Un gol qu'a liberat l'equipa alemanda e qu'a sustot dinamizat los espèrs deus Iranja, incapables de defénder correctament. Gómez, tostemps eth, doblava l'escòre un pauc abans la pausa dab un tir que lo malurós Stekelenburg a pas podut arrestar.

 

Menat 2 a 0, País Baish an mei temptat en segond periòde, mercés notadament a l'entrada de Huntelaar, mei bon golaire de Bundesliga aquesta annada. Una esperit subervita qu'a pagat a un quart d'òra de la fin de la partida: lançat, l'atacant d'Arsenal Van Persie tirava de 20 mètres e redusiva l'escòre. Mes Alemanha a provat gèr que se son fotbòl a evoluat per mei d'animacion ofensiva despuish quauquas annadas, guarda tostemps una defensa solida qu'ei pas aisida de bolegar.

 

Dab aquera victòria 2 a 1, Alemanha ei quasi assegurada de jogar los quarts de finala. Per País Baish, se vòlen concretizar lo pichon espèr de qualificacion, calerà mei de coesion e de motivacion en lo darrèr encontre contra Portugal. Pròva d'aquera manca de collectiu: Robben, autor d'una partida pas tarribla, a pas briga apreciat d'estar remplaçat peu seleccionaire olandés e ne s'ei pas balhat la pena d'anar tocar la man au jogaire qu'entrava suu terrenh.

 

 

 

Logicament batuts per Alemanha en lo prumèr encontre, Portugal devèva absoludament préner punts contra una equipa de Danemarc qu'a creat la sensacion en debut d'Euro en dominant País Baish. Ger sèr los lusitans an subit pendent pas prumèras minutas de jòc abans lo gol de Pepe sus corner, seguit per Postiga qui permeteva aus portugués de menar 2 a 0. Pas abatuts, los danés tornavan a l'ataca e redusivan l'escòre abans la pausa per Bendtner.

 

En segond periòde, Portugal profieitava d'una defensa danesa mau organizada per se crear d'ocasions per mancava a cada còp de concretizar. Danemarc egalizava a 10 minutas de la fin, tostemps per un còp de cap de Bendtner. Urosament per Portugal Varela, qui vienèva d'entrar suu terren, a desliurat son equipa d'un bon tir dens la susfàcia e permetut a Portugal d'enregistrar sa prumèra victòria de l'Euro 2012. Los darrèrs encontres seràn decisius per conéisher los qualificats.

 

De notar totun la contra performància de Cristiano Ronaldo, qu'ei pas briga a la hautor d'un potenciau balon d'aur. Lo madrilenc a mancat dus còps l'escadença de tuar la partida e ne semblava pas a d'aisa sus la pelosa. Cau díser que lo Ronaldo de la seleccion portuguesa ei pas jamèi estat au nivèu deu Ronaldo deu Real Madrid.




Matieu Casanòva