Los telefòns mobils iPhone, de la societat estatsunidenca Apple, serián “una menaça per la seguretat nacionala de China” segon un reportatge qu’emetèt la television chinesa CCTV. Segon aquel mèdia public, lo chepic es l’usatge massís de las aplicacions de geolocalizacion.
 
Segon Ma Ding, directritz de l’Institut de Seguretat dins Internet de China, en activant un paramètre d’aquel modèl de telefòn mobil, se pòt seguir la pista d’una persona. Segon Ding, l’aparelh pòt amassar un fum de donadas de cada usatgièr: sas abituds, que consuma, amb qui comunica…
 
Òm calcula qu’en China i auriá mai d’un bilion de telefòns mobils connectats a Internet, dont los aparelhs d’Apple farián un percentatge considerable. Segon las previsions de venda pel darrièr modèl d’iPhone en China, son de 24 milions d’aparelhs en 2014. Es aital que l’entrepresa estatsunidenca poiriá aver, a l’ora d’ara, d’informacions sus las condicions de vida e d’economia del país asiatic, e quitament obténer d’informacions consideradas de “secrets d’estat”.
 
Pasmens cal dire que mantas societats fan de telefòns intelligents amb de geolocalizacion, non solament Apple. Entre elas i a las chinesas Huaiwei e ZTE.
 
Lo govèrn chinés contraròtla las entrepresas estrangièras de telecomunicacions, çò que provòca que las societats fagan d’esfòrces per plaire a las autoritats chinesas. Es pas lo primièr còp que l’estat chinés met en question la societat Apple, e mai se l’iPhone 5 se fabrica en China jos de condicions umanas deplorablas.