Un avion de la companhiá argeriana Air Algérie tombèt ièr près d’Azawad o de Gao mentre que volava de Burkina Faso a Argeria, saique a causa d’una fòrta tempèsta amb 116 personas a bòrd. Lo vòl èra operat per la societat espanhòla Swiftair.
 
L’avion auriá demandat l’autorizacion de modificar sa rota a causa de la “marrida visibilitat” e del “risc de collision” amb un autre aparelh, çò diguèron a l’AFP de fonts d’Air Algérie. De fach lo pilòt aviá contactat lo contraròtle de Nigèr e alertava que i aviá un risc de chòc amb un autre avion.
 
Lo darrièr còp que se vegèt l’avion foguèt a 3h33 del matin, ora d’Occitània, quand subrevolava la vila de Gao.
 
L’esquipatge èra tot de l’estat espanhòl; demest los passatgèrs i aviá aperaquí 60 ciutadans europèus e un trentenat d’africans. Totes son mòrts.
 
Se tracta d’un nòu drama dins aquesta setmana negra per l’aviacion, après l’atac contra l’avion de Malaysia Airlines en Ucraïna e l’accident d’un avion de TransAsia Airlines, dimècres de ser, en Taiwan. Dins aquesta setmana son mòrtas aperaquí 350 personas a causa d’aquestas tragèdias.