Una familha lemosina moriguèt divendres de matin dins un accident a Saulvaux (Lorena). Las victimas son doas sòrres de 35 e 41 ans e tres enfants de 7 e 13 ans, doas sòrres e lor cosin. Al delà, lo companh d’una de las doas femnas mòrtas, paire del dròlle de 7 ans, se suicidèt a Lemòtges, a causa del desespèr, quand coneguèt la trista nòva.
 
Anavan sus una porcion de l’estrada RN4 de 2 x 2 vias, quand la veitura s’escrachèt literalament contra un camion, qu’aviá traversat lo tèrraplen central e que veniá en sens invèrs.
 
Lo menaire del camion, un òme de 35 ans, foguèt espitalizat après l’accident. “Las analisis toxicologicas an revelat una quantitat tala de cocaïna que se pòt deduire, d’un biais fòrça probable, que la presa d’estupefasents s’es facha dins las qualques oras qu’an precedit sa presa de volant”, çò expliquèt lo procuraire de Bar-le-Duc, Rémi Coutin, segon Midi Libre.