Era istorica formacion musicau aranesa Es Paums a tornat a amassar a quauqui uns des sòns compausants entà impulsar un nau projècte musicau centrat ena cultura dera Val d’Aran. Eth renauit grop presente un interessant repertòri qu’includís musica tradicionau e populara, aranesa-occitana e catalana, quauqui tròç de creacion pròpria e auti de grops aranesi coma Sarabat e Bramatopin.
 
Es Paums, laguens aguesta iniciatiua culturau, an iniciat un ambiciós projècte que pretenen méter musica a quauqui uns des mès importants poètes aranesi de toti es tempsi. Eth prumèr frut d’aguest trabalh ei era composicion Net de huec, un slow entà acordeon, saxo soprano, contrabaish, guitarra, bateria, galin e votzes, basat ena òbra deth madeish títol de Jèp de Montoya, que serà presentada peth grop aranés en sòn concèrt deth 15 d’agost que ven en Vilamòs.
 
Eth concèrt que ven des Paums que hè part dera aficha deth programa dera Hèsta Major de Vilamòs que se celèbre es dies 14, 15 e 16 d’agost que vién. Eth concèrt se celebrarà eth dia 15 d’agost as 23h30; ei patrocinat per ajuntament de Vilamòs damb era collaboracion deth Conselh Generau d’Aran e era entrada serà gratuita.
 
Aguest concèrt que serà eth tresau d’ua seguida que hè part des actes de celebracion deth 40u anniversari dera fondacion deth grop en Vilamòs e ei ua petita aportacion que vò contribuir a difóner eth ric patrimòni musicau aranés. Eth grop, que passegèc era denominacion e era musica aranesa per tota era geografia, se constituic en Vilamòs en agost de 1973.
 
 
 
 
J. Castet