Lo deputat socialista del departament de Gironda, Gilles Savary, a ofèrt a la reina d’Anglatèrra una caissa de sièis botelhas de vin de Sautèrna. “Es un omenatge au pòble anglés per l’eroïsme demostrat durant la Segonda Guèrra Mondiala”, çò declarèt Savary al microfòn de France Bleu; e qu’apondèt que lo present èra “tanben en l’aunor deus soldats britanics qu’assegurèren la luta contra los faishismes nazi e japonés”. Mas lo protocòl a Buckingham Palace es fòrça estricte. Es aital que lo deputat gascon deguèt far una longa letra al palais reial anglés, amb l’ajuda del consolat britanic, fins que recebèt la responsa positiva.
 
Tanben se’n felicitèt Xavier Planty, president de l’apelacion Sautèrna e director de Castèthguiraud, que preparèt lo mandadís tot content. Lo present per la reina anglesa a una valor de 160 èuros, segon d’informacions de Le Figaro, e conten un Castèthguiraud primièra qualitat classat 2009 biologic, un Castèthbastor La Montanha 2009, un Castèthrabaud primièra qualitat classat 2009, un Castèthclòta-Casalis 2009, un Domeni de l’Alliança biologic e un Castèthlavila 2009.
 
L’idèa del present venguèt en seguida d’un repais organizat al començament de junh per commemorar lo 70n anniversari del desbarcament de Normandia. Los presents descobriguèron qu’Elisabeta IIa aima plan aquel bon vin de la Grava de Bordèu, e tanben lo fetge gras e mai s’es interdich dins son país. Semblariá qu’Elisabeta IIa se’n remembrèsse de las sabors que degustavan sos aujòls abans l’invasion francesa d’Aquitània.