Coma cada an dempuèi vint e sèt annadas, de centenats d’occitans e catalans s’amassan uèi al Pòrt de Salau, al limit occitanocatalan, per Coseran, a 2100 mètres de nautada. Los participants puèjan del costat occitan de Salau (Coseran), en tot marchar doas oras e mièja, e del costat catalan d’Esterri d’Àneu (Palhars Sobeiran) en tot caminar qualques 45 minutas. L’amassada es organizada pel CAÒC e per l’ASPIC, coma una escorreguda d’amistat e de revendicacion nacionala dels dos pòbles vesins. Ongan la jornada compta amb lo sosten de l’Assemblada Nacionala Catalana (ANC), Òmnium Cultural e qualques elegits catalans.
 
Un còp sul pòrt, s’i fa d’actes d’afrairament amb un escambi de produches dels dos costats: de formatge, de vin, de liquors amb de ratafià, de galetas, de chocolat, de carnsalada, etcetèra. Tanben i dançan de danças tradicionalas al son dels musicians pirenencs, occitans e catalans. Al delà, se debanan, coma d’abitud, los discorses de benvenguda, las cançons e los imnes en issant las doas bandièras. Ongan se fa un mosaïc gigant revendicant que los catalans pòscan votar lo 9 de novembre que ven sus l’independéncia.
 
L’emplaçament d’aquel pòrt es simbolic: es un camin natural entre Occitània e Catalonha, qu’a servit istoricament per far de comèrci e per connectar los dos pòbles. Pendent la Guèrra d’Espanha de milièrs de republicans i passèron en essent sus lo camin de l’exili. Normalament los occitans i menan lo formatge del temps que los catalans menan lo vin.
 
 
L’assemblatge d’Occitània dins l’encastre d’una Catalonha independenta
 
Ongan los actes an començat una jornada abans del costat catalan. Ièr a Esterri d’Àneu, l’ANC, Òmnium Cultural e qualques elegits dels partits catalans favorables al referendum per l’independéncia participèron en un debat sus l’“assemblatge d’Occitània dins l’encastre d’una Catalonha independenta”. Lo debat foguèt acompanhat per d’animacions pendent tota la serada.