Valérie Trierweiler a secodit lo Partit Socialista francés (PS) e l’assopida campanha electorala entre los dos torns dels comicis. En un comentari sus Twitter, dimars passat, balhèt son sosten a Olivier Falorni, rival de Ségolène Royal dins la primièra circonscripcion de Charanta Maritima, perque “se bat al costat dels rocheleses dempuèi tantas annadas dins un engatjament desinteressat”. Dimècres, Trierweiler diguèt que son compte de Twitter èra estat piratejat.

Lo cas, es que Trierweiler es la femna actuala del president francés François Hollande e Royal es l’èx-esposa e la maire dels sieus quatre enfants.
 
La piulada del Twitter de Trierweiler, primièra dòna francesa, causèt polemica dins la direccion del PS d’Hollande que balha lo sieu sosten a Royal, qu’es la candidata oficiala. Per contra, Falorni es un candidat socialista que seguís pas las consignas dels dirigents del partit.
 
Segon Falorni, es un “insulte als militants” que lo PS presente Royal coma candidata per la circonscripcion de Charanta Maritima sens èsser passada per d’eleccions primàrias; es per aquò que concor a las eleccions, malgrat l’oposicion del partit. Dimenge, Royal obtenguèt 32,03% dels vòtes e Falorni, 28,91%. Aquò permetiá a Falorni de se presentar al segond torn per disputar lo sèti a Royal, e s’i es presentat.
 
Lo comentari de Trierweiler aluca tornar-mai lo debat sus la vida privada dels personatges publics e sus se l’esposa del president francés, jornalista de profession, es liura de defendre publicament la siá opinion de l’Elisi estant. En general, los mèdias an reagit amb duretat a la piulada de Trierweiler; e en particular, Royal se planh dels atacs “personals” e del “mesprètz” de Trierweiler.